Илсур Метшин: «Илебезнең тотрыклылыгына һәм халыкның һәм бизнесның адаптив сыйфатларына сокланасы гына кала»

(Казан шәһәре KZN.RU, 27 нче ноябрь, Диләрә Гафурова). Татарстан Республикасы башкаласында агымдагы елның гыйнвар-сентябрь айларында сәнәгать җитештерүе индексы 103,3% тәшкил итте. Бу хакта эшлекле дүшәмбедә Казан Башкарма комитеты җитәкчесе урынбасары Илдар Шакиров хәбәр итте.

«Гомумән алганда, илебезнең тотрыклылыгына һәм халыкның һәм бизнесның адаптив сыйфатларына сокланасы гына кала. Тугыз ай эчендә Россиянең тулаем эчке продукты 2,8% ка артты, ә сентябрьдә еллык күрсәткечкә карата 5% тан артып китте», - дип уртаклашты Мэр Илсур Метшин һәм илдә тулаем эчке продукт 2021 елгы санкциягә кадәрге дәрәҗәгә чыкты дип өстәде. 

«Безнең предприятиеләр бу трендта калалар. «Теплоконтроль» – ике тапкыр, «Элекон заводы» 35% ка диярлек үсеш күрсәткән. «Казанкомпрессормаш», «Вакууммаш», КМПОны билгеләп үтәм. Казан сөт комбинаты 1 мең тоннадан артык эшкәртүгә чыкты – бу республика авыл хуҗалыгы эшенең күрсәткече дә. Без – илдәге иң эре сөт җитештерүчеләрнең берсе, ләкин заводны йөз тоннадан азрак сөт эшкәртә торган хәлдә алган Ижевск инвесторларын билгеләп үтәргә кирәк. Хәзер алар көненә 1 мең тонна сөт эшкәртүгә чыктылар һәм бу бик зур сан», – дип билгеләп үтте шәһәр башлыгы. 

Эре һәм урта предприятиеләрдә уртача айлык хезмәт хакы 73 мең сумнан артып киткән

Илдар Шакиров сөйләгәнчә, сәнәгать продукциясенең төп төрләре буенча Казан предприятиеләре 478,6 млрд сумлык үзләре җитештергән товарлар җибәргән, эшләр башкарган һәм хезмәт күрсәткән, бу узган ел дәрәҗәсеннән 9% ка диярлек югарырак. 

Югары җитештерүчәнлекне дустанә илләрдән чимал һәм җиһазлар белән тәэмин итүче предприятиеләргә йөз тоткан предприятиеләр күрсәтте. «Теплоконтроль», «ТатВойлок», «Татэлектромонтаж», «Вакууммаш», «Элекон заводы», Күмәч-кондитер комбинаты һәм Казан сөт комбинаты кебек предприятиеләр турында сүз бара. 

Мәсәлән, «ТатВойлок» техник, аяк киеме, тирмә һәм төзелеш киезләрен эшкәртү һәм җиткерү өлкәсендә лидер. Быел бу максатларга Төркмәнстаннан 19 тоннадан артык йон китерелгән. 

Шул ук вакытта «Татэлектромонтаж» продукция җитештерүне 30% ка арттырды. Предприятие М12 автомобиль юлын һәм Мәскәү метрополитенының яңа тармагын төзегәндә ЛЭП терәкләре һәм электр җиһазлары белән тәэмин итүче булды. 

«Агымдагы елда Күмәч-кондитер комбинатында икмәк-күмәч эшләнмәләренең 11 төре эшләнде һәм җитештерүгә кертелде», - дип өстәде Башкарма комитет җитәкчесе урынбасары. Аның сүзләренчә, тугыз ай эчендә продукция сатудан кергән керем 15,5% ка артып, 1,5 млрд сумга җиткән. 

Бу чорда эре һәм урта предприятиеләрдә уртача айлык хезмәт хакы 73 мең сумнан артып китә һәм 2022 елның шул ук чоры белән чагыштырганда номиналь исәпләүдә – 18% ка, реаль исәпләүдә 13% ка арта. 

Ярты ел эчендә Казан предприятиеләре 120 млрд сум инвестиция җәлеп иткән

Ярты ел йомгаклары буенча Казан предприятиеләре тарафыннан төп капиталга 120 млрд сум инвестиция җәлеп ителгән, бу чагыштырма бәяләрдә узган елгы дәрәҗәдән өчтән бер өлешкә югарырак. Шул ук вакытта эре һәм урта предприятиеләр җәлеп иткән инвестицияләр күләме 95,5 млрд сумга җиткән. 

«Инвестицияләрнең шактый өлеше төзелештә һәм милек белән операцияләрдә тупланган. Бу юнәлешләргә кертемнәрнең гомуми өлеше 97% тан артып киткән. Шәһәр икътисадына җәлеп ителгән шәхси инвестицияләр турында сүз барганда, Идел буе районында тротуар плиткасы җитештерү буенча яңа завод ачылуын билгеләп үтәргә кирәк. Предприятиегә кертемнәр 400 млн сум тирәсе тәшкил итте», – дип уртаклашты спикер. 

Төзелеш өлкәсендә эре һәм урта предприятиеләр тарафыннан башкарылган эшләр күләме 43 млрд сумга җиткән. Күпчелек өлеше традицион рәвештә торак төзүгә туры килә. Хисап чорында барлыгы 1 млн 30 мең кв.м торак файдалануга тапшырылган, бу 2022 ел белән чагыштырганда 45% ка күбрәк. 15 595 фатир һәм 1 343 шәхси торак йорт төзелгән һәм файдалануга тапшырылган, дип йомгаклады Илдар Шакиров. 

Нәтиҗәдә, Россиянең эре шәһәрләре арасында Казан 2022 елда торакны файдалануга тапшыру буенча җиденче урыннан өченче урынга күчте.