И.Метшин: «Бу - һәр казанлы шәһәребезнең экологик иминлеге турында кайгырта ала һәм кайгыртырга тиеш булган очрак»

(Казан шәһәре KZN.RU, 16-нчы ноябрь, Алена Мирошниченко). Казан миллионлы Россия шәһәрләре арасында каты көнкүреш калдыкларын аерым төрләргә бүлеп җыю инфраструктурасы буенча Мәскәүдән соң икенче урында тора. Эшкәртүгә юнәлдерелгән калдыклар күләме нигезендә Greenpeace экология оешмасы шәһәргә шундый бәя бирде. Казанда чүп-чарны аерым төрләргә бүлеп җыю кертелгәч, чыгарыла торган икенчел чимал өлеше ике тапкырга диярлек арткан - 8-дән 15%-ка кадәр. Бу хакта бүген Казан Башкарма комитетының эшлекле дүшәмбесендә Башкарма комитет җитәкчесе урынбасары Искәндәр Гыйниятуллин сөйләде.

И.Гыйниятуллин искә төшергәнчә, Федераль Җыенга юлламасында ил Президенты Владимир Путин калдыкларны полигоннарга чыгаруны тамырдан кыскарту зарурлыгын ассызыклады. Моның өчен һәр җирдә каты коммуналь калдыкларны аерым төрләргә бүлеп җыю кирәк.

Казанда моның белән 2018 елда шөгыльләнә башладылар. «Хәзерге вакытта шәһәр йортларының 80%-ка якыны калдыкларны эшкәртү һәм эшкәртелмәгән фракцияләргә калдыкларны аерым туплау өчен контейнерлар белән җиһазландырылган. Ике ел эчендә шәһәрдә калдыкларны аерым төрләргә бүлеп җыю өчен контейнерлар белән җиһазландырылган 174 заманча контейнер мәйданчыклары төзелгән. Шул исәптән идарәче оешмалар көче белән 116 контейнер мәйданчыгы төзелгән, тагын 58-е быел «Безнең ишегалды» программасы кысаларында төзелгән», - дип хәбәр итте Искәндәр Гыйниятуллин. Аның сүзләренчә, контейнер мәйданчыкларын төзү буенча типовой карарлар шәһәр төзелеше сәясәтенең җирле нормативларына кертелгән һәм торак фонды һәм социаль объектлар төзелеше кысаларында төзүчеләргә тәкъдим ителгән.

Моннан тыш, Казан Башкарма комитетының барлык бүлекчәләре калдыкларны аерым туплау өчен савытлар белән җиһазландырылган.

2018 елдан мәгариф программасына экологик тәрбия дәресләре кертелгән. Программа балалар бакчаларында тәрбияләнүчеләрне, мәктәп һәм өстәмә белем бирү учреждениеләрен үз эченә ала. Шәһәрнең барлык мәктәпләре һәм балалар бакчалары шулай ук эшкәртелә торган калдыкларның төрле төрләре өчен савытлар белән җиһазландырылган.

Шәһәрнең 20 мәктәбендә фандоматлар куллану буенча пилот проект гамәлгә ашырылган, дип билгеләп үтте И.Гыйниятуллин. «Тара тапшыр - призлар от» акциясендә ике меңнән артык укучы катнашты, иң активлары сентябрьдә Казан Мэры Илсур Метшин кулыннан кыйммәтле призлар алды.

Шәһәрдә икенчел чималны җыю һәм эшкәртү буенча эре дөньякүләм компанияләр проектлары да гамәлгә ашырыла. «Мәгариф экология кластерына әверелә торган Горки-Әмәт урманында Zero Waste Lab интерактив белем бирү проекты эшли башлады. Паркка килүчеләр өчен калдыкларны аерым төрләргә бүлеп җыю өчен чүп савытлары, мәгълүмати щитлар урнаштырылган, ә паркта икенчел чималны нәтиҗәле файдалану үрнәге буларак эшкәртелгән пластиктан ясалган урам җиһазлары кулланыла. Барысы да бер максатка юнәлтелгән - шәһәрлеләребездә чүп-чарга җаваплы караш тәрбияләү», - диде И.Гыйниятуллин һәм казанлыларны чүп-чарны аеру буенча актив эшләргә өндәде.

«Бу зур һәм бик катлаулы эш. Без дөньядагы иң яхшы тәҗрибәләрне өйрәнәбез һәм күп кенә алга киткән илләрнең бу юлны хәтта 10-15-20 ел эчендә дә узуын дәвам итүләрен аңлыйбыз. Шуңа күрә бер мизгеллек нәтиҗәләр көтәргә кирәкми, әмма көн саен, атна саен, ай саен, без ел саен нәтиҗәләр күрәбез. Без бу юлны безнең белән бергә узучы битараф булмаган халкыбызга, төп көрәштәшләребезгә рәхмәтле», - диде Казан Мэры Илсур Метшин.

Шәһәр башлыгы билгеләп үткәнчә, аңлы рәвештә чүп-чарны утильләштерүче халык әлегә азчылык, шуңа күрә эшне дәвам итәргә, аерым төрләргә бүлеп җыю турында сөйләргә һәм бу мәсьәләне системалы рәвештә күтәрергә кирәк. «Бу без барыбыз бергә - һәр казанлы - үз өебездә, эштә, яшәү урыны буенча шәһәребезнең экологик иминлеге турында кайгыртырга мөмкин һәм тиеш булган очрак», - дип йомгаклады шәһәр башлыгы.