Илсур Метшин «Йөзьяшәрләр уеннары» турында: «Казанда яши торып, пенсияне өйдә, ишегаллары ремонтланган булса да, анда үткәрү дөрес түгел»

(Казан шәһәре KZN.RU, 3 нче октябрь, Диләрә Гафурова). Бүген Үзәк стадион манежында беренче «Йөзьяшәрләр уеннары. Яшәү яме»нең ачылышы булды. Спорт ярышларында 350 кеше катнаша, шәһәрнең барлык районнарыннан профессионаллар да, өлкән яшьтәге спорт яратучылар да килгән. 800 дән артык кеше трибуналарга үз иптәшләре өчен җанатарга җыелган. Казан Мэры Илсур Метшин ачылыш тантанасында катнашты һәм «Йөзьяшәрләр уеннары»нда катнашучылар белән өстәл теннисы уйнады.

Катнашучыларны сәламләп, шәһәр башлыгы «тормыш сөючеләр»нең энтузиазмын билгеләп үтте һәм барлык ветераннарга һәм пенсионерларга республика һәм аның башкаласы үсешенә керткән өлешләре, шулай ук яшь казанлылар өчен сәламәт яшәү рәвешенең лаеклы үрнәген күрсәтүләре өчен рәхмәт белдерде. 

«Без бу проектны шәһәребез, республикабыз һәм илебез өчен эшләгән һәм хәзерге көндә дә эшләүче сезнең буынга хөрмәт һәм рәхмәт йөзеннән уйлап таптык. Сез – энтузиазм һәм тормышны ярату үрнәге. Казан һәм республика балалары һәм яшүсмерләре сезгә тиңләшергә тырышачак. Бу проектның традиционга әйләнәчәгенә һәм озак яшәячәгенә ышанам», - дип мөрәҗәгать итте катнашучыларга шәһәр Мэры. 

Илсур Метшин Казанның социаль инфраструктура объектларының актив озын гомер вәкилләре белән тулып торуын теләде: 

«Казанда яши торып, пенсияне өйдә, ишегаллары ремонтланган булса да, анда үткәрү дөрес түгел. Җәйге сезон тәмамланды, көз, кыш, яз – актив озын гомер өчен. Бездә Казанның 91 объекты «Яшәү яме» проекты белән колачланган. Без локацияләрнең бөтен Казан буенча булуы өчен тырышабыз, спорт белән шөгыльләнергә теләгән һәркем өеннән ерак китмичә шөгыльләнсен, шулай ук мәдәният йортларына йөри алсын. Сезгә карап, күршеләрегезнең, дусларыгызның, танышларыгызның йөрәкләре кабынсын. 

«Йөзьяшәрләр уеннары»ның мактаулы кунагы, Афинадагы Олимпия уеннарының көмеш призеры, 10 мәртәбә дөнья чемпионы, 18 мәртәбә Европа чемпионы Светлана Демина, катнашучыларны сәламләп, быел сентябрьдән башлап «Яшәү яме» проекты кысаларында 20 муниципаль спорт объектына тренировкаларга бушлай йөрергә мөмкин булуын хәбәр итте: 

«Без спортны ничек ачык итәргә икәнлеге турында күп еллар уйладык һәм ниһаять моны эшли алдык. Хәзер теләсә кайсы спорт объектына килеп, бушлай спорт белән шөгыльләнергә мөмкинлек бар. Сезгә ныклы сәламәтлек һәм озын гомер телим». 

Ярышларда катнашучылар парадыннан һәм мәдәни программадан соң Илсур Метшин спорт активлыклары мәйданчыкларын карады, шулай ук катнашучыларның кайберләре белән өстәл теннисы уйнады. 

«Йөзьяшәрләр уеннары. Яшәү яме» спартакиадасы ике этаптан тора. Иң яхшы спортчыларны сезон дәвамында район этабында сайлап алачаклар. Шәһәр финалы 2024 елның маенда узачак, анда катнашучылар һәр дисциплинада җиңү өчен көрәшәчәк. 

Ярышлар җиде спорт төре буенча уза: йөзү, өстәл теннисы, дартс, җиңел атлетика кроссы, шахмат, скандинавия йөреше һәм ГТО. 

Әйтик, Казан төгәл машиналар төзү заводының 83 яшьлек ветераны Петр Индерейкин дартс ыргытуда катнашачак, ә 62 яшьлек Миләүшә Сәгиева скандинавия йөрешендә күпьеллык тәҗрибәсен күрсәтәчәк, бу спорт төре белән ул 2016 елдан бирле шөгыльләнә. 

75 яшьлек Минвәли Йосыпов билгеләп үткәнчә, озын гомер уеннарында җиңү мөһим түгел: «Безнең өчен хәрәкәт итү мөһим. Оештырганнары, чакырганнары өчен рәхмәт. Без әле уйнап, йөгереп туймадык. Алга таба да ел саен катнашырга телибез». 

Бүген Үзәк стадионда Казанның һәр районыннан 350 катнашучы, шулай ук 800 дән артык җанатар җыелды. Мәсәлән, Любовь Шевцова Авиатөзелеш районы өчен җан атарга килгән, анда ул гомер буе яши һәм эшли. 

«Бу Уеннарда катнашу – мактаулы статус. Бездән катнашырга теләүчеләр бик күп, әмма минем теләгем – спортчыларны трибуналардан дәртләндерү һәм үз районыбыз өчен җан ату. Бәлки киләсе елда мин дә уеннарда катнашырмын», - диде ул. 

«Алтын яшь»тә төрле спорт төрләрендә ярышырга гына түгел, биергә дә мөмкин. Мәсәлән, ТР халык артисты Рифат Әбелханов җитәкчелегендәге «Яшәү яме» проекты төркеме ча-ча-ча биюен тәкъдим итте. Коллектив җитәкчесе пенсионерларның искиткеч сәләтләрен билгеләп үтте: 

«Без биюне бик тиз куйдык, «тормыш сөючеләр»нең һәрберсенең искиткеч сәләтләре бар. Биючеләрнең яше 55 яшьтән 90 яшькә кадәр. Хатын-кызлар күпкә күбрәк, ир-атлар составның 10% ын тәшкил итә. Барысы да зур теләк белән бииләр һәм без аларга бу яклап ярдәм итәбез. Вальс, бачата, салса биибез. Кайбер пенсионерлар авырудан соң тернәкләнү өчен киләләр. Бу бию терапиясе җан өчен». 

«Озын гомер уеннары. Яшәү яме»ндә катнашучыларның һәрберсе яшьнең сан булуын, ә хәрәкәтнең тормыш булуын исбатлый. Проект Казан Мэры Илсур Метшин инициативасы белән оештырылды.