И.Метшин: «10 ел эчендә без Казанның торак фондының 63%- ын капиталь ремонтладык»

(Казан шәһәре KZN.RU, 13-нче декабрь, Ксения Швецова). Казанда быел 293 күпфатирлы йортка капиталь ремонт ясалды: түбә, фасадлар яңартылды, инженерлык челтәрләре һәм лифтлар алыштырылды. Башкарылган эшләр күләме 98%-тан артып китә, калган йортлар буенча ачыкланган кисәтүләр бетерелә.

«10 ел эчендә без зур юл уздык, бүгенге көнгә Казанның торак фондының 63%-тан артыгы капиталь ремонтланды, – диде шәһәр башлыгы. – Гомер буена җитәрлек ремонт булмый, нәрсәне дә булса эшләдек тә һәм гомерлеккә оныттык. Әмма торак фондының, шул исәптән челтәрләрнең, лифт хуҗалыгының, түбәләрнең торышы киләсе унъеллыкларга ышанычлы халәткә китерелде». Исегезгә төшерәбез, программа буенча шәһәрдә 3493 йорт ремонтланган инде.

Агымдагы елда башкарылган эшләр: 144 түбә һәм 103 фасад ремонтланган, 170 лифт алмаштырылган

Казанда күп фатирлы йортларны капиталь ремонтлау буенча өч еллык программа нигезендә 7 млрд. сумнан артык суммага 740 йортны ремонтлау планлаштырыла. Быел аларның 293-е яңартылган, киләсе ел программасына 171 йортны керткәннәр, дип хәбәр итте шәһәр Башкарма комитетының Торак-коммуналь хуҗалык комитеты рәисе Дмитрий Анисимов.

Торакны капиталь ремонтлау программасы «Безнең ишегалды» ишегалды территорияләрен төзекләндерү программасы белән туры килә – быел 22 йортта яшәүчеләр ике программа буенча да нәтиҗәләрне бәяли алды.

Быел барлыгы 144 түбә һәм 103 фасад ремонтланган, 122 йортта йорт эчендәге инженерлык челтәрләрен алыштырганнар, 59 йортта 170 яңа лифт урнаштырылган, шулай ук йортларда  һава торышына карап көйләү җайланмалары барлыкка килә, подъездлар яңартыла һәм башка эшләр башкарыла.

«Тиешле комиссияләр капиталь ремонттан соң 293 йортның 266-сы буенча уздырылган, калган йортлар буенча ачыкланган кисәтүләр бетерелә», – диде Д.Анисимов. Аның сүзләренә караганда, бүгенге көнгә ремонт эшләре 98,31%-ка үтәлгән.

Йортны капиталь ремонтлау программада каралган эшләр белән генә чикләнми, дип ассызыклады Д.Анисимов. Өстәмә эшләр башка программалар һәм чыганаклар хисабына алып барыла. Әйтик, ишегалларында калдыкларны аерым җыю өчен мәйданчыклар урнаштыралар – 2020-2021 елларда 317 контейнер мәйданчыгы төзекләндерелгән, шуларның 155-е – идарәче компанияләр көче белән, 162-се – «Безнең ишегалды» программасы буенча. Шулай ук ИК акыллы домофон, ишекләрне автомат рәвештә ачу системасы, «антиспам» махсус почта тартмалары урнаштыру һәм башкалар кебек инновацион технологияләр кертә. Мисалга Д.Анисимов Волгоград урамындагы 2-нче номерлы йортны китерде, аның территориясендә идарәче компания электромобильләр өчен зарядка алу станциясе урнаштырган.

Агымдагы ремонт: 52 йортның түбәсен һәм 169 йортның фасадын ремонтлаганнар

Д.Анисимов шулай ук агымдагы ремонт барышы турында да сөйләде. Ел саен идарәче компанияләрнең күбесе планлы-кисәтү ремонтының исемлеген формалаштыра. Финанслау агымдагы ремонт маддәсе буенча җыелган халык акчасыннан гына гамәлгә ашырыла.

«Еш кына бу эшләр капиталь ремонт үткәрүдә зур ярдәм булып тора. Шул ук вакытта торак йортларны яз һәм көз карап чыгу күрсәткечләре, йорт эчендәге инженерлык системаларының, түбәләрнең, фасадларның, подъездларның торышы һәм күзәтчелек органнарының бирелгән күрсәтмәләре исәпкә алына», – дип аңлатты ТКХ комитеты рәисе.

Быел план-кисәтү эшләре кысаларында 52 йортның түбәсе яңартылды, 169 йортның фасадын ремонтладылар һәм 48 йортта җылылык белән тәэмин итү челтәрен ремонтладылар.