Казан ратушасында иң яхшы архитектура һәм шәһәр төзелеше үрнәгенә игълан ителгән смотр-бәйгегә йомгак ясалачак

12 декабрьдә Казан ратушасында Казанның иң яхшы архитектура һәм шәһәр төзелеше үрнәген ачыклау максатыннан игълан ителгән смотр-бәйге җиңүчеләрен бүләкләү тантанасы узачак. Бу елны конкурс комиссиясенә рекордлы санда гаризалар тапшырылган. Бәйгедә 230 проект катнашкан. Бу хакта эшлекле дүшәмбедә шәһәрнең баш архитекторы Илсөяр Төхвәтуллина хәбәр итте.

«Иң яхшы архитектура-шәһәр төзелеше чишелеше бәйгесенә йомгак ясауга килгәндә, тотрыклы үсеш өлкәсендә яңа номинация барлыкка килүе мөһим. Бу безнең ниятләребезнең җитдилеген һәм эшнең системалы булуын тагын бер кат раслый»,- дип билгеләп үтте шәһәр мэры Илсур Метшин.

Җиңүчеләрне өч категория буенча 13 номинациядә игълан итәчәкләр. «Иң яхшы социаль объект интерьеры дизайны» номинациясенә 24 гариза тапшырылган, шуларның 10 сы – гамәлгә ашырылган объектлар. Моңа заманча балалар бакчалары, мәктәпләр һәм поликлиникалар керә.

Тотрыклы үсеш өлкәсендәге юнәлешкә узган ел нибары өч проект бирелгән булган, бу елгы күрсәткеч – 16. «Бу экология, энергия нәтиҗәлелеге һәм ресурслардан рациональ файдалану мәсьәләләренең шәһәр һәм профессиональ бергәлек өчен өстенлекле булуын күрсәтә», - диде Илсөяр Төхвәтуллина.

Исегезгә төшерәбез, Казанда Татарстан Республикасы башкаласының иң яхшы архитектура һәм шәһәр төзелеше проекты өчен игълан ителгән смотр-бәйгенең онлайн-тавыш бирү чарасы тәмамланды. «Шәһәрлеләрнең сайлавы» номинациясе буенча үткәрелгән сораштыруда 5649 шәһәр кешесе катнашкан.