Илсур Метшин: «Без парк зоналары санын биш тапкыр – 132 гектардан 625 гектарга кадәр арттырдык»

Серов урамындагы бульварны, Акчарлак күлләрен һәм Миславский урамындагы скверны быел «Тормыш өчен инфраструктура» милли проектының «Уңайлы шәһәр мохитен формалаштыру» федераль проекты буенча төзекләндерәчәкләр. Республика акчалары исәбенә Г.Камал исемендәге яңа театр янында балалар мәйданчыгын төзү төгәлләнәчәк. Бу хакта эшлекле дүшәмбедә Казанның тышкы төзекләндерү комитеты рәисе Игорь Сәләхетдинов хәбәр итте.

Бүгенгә шәһәрнең төзекләндерелгән парк зоналары мәйданы 625 гектар тәшкил итә, соңгы 15 елда бу күрсәткеч биш тапкырга арткан. 54 яңа парк һәм сквер төзелде, 56 инде булган яшел зона төзекләндерелде.

«Шәһәрнең яшел каркасын формалаштыру безнең өчен өстенлекле юнәлеш булып тора. Без бу мәсьәлә өстендә системалы эшлибез. 2010 елда «100 сквер» программасыннан башлаган идек. Бүген, Татарстан рәисенең республика программасы ярдәмендә, без парк зоналары һәм җәмәгать урыннары санын биш мәртәбә – 132 гектардан 625 гектарга кадәр арттырдык. Хәзер без скверлар һәм парклар белән генә шөгыльләнмибез, системалы эш бөтен шәһәребез буенча экологияне яхшыртуга китерсен өчен, без Казанны яшел каркас итеп карыйбыз», –дип ассызыклады Казан мэры Илсур Метшин.

Узган ел БРИКС саммиты алдыннан шәһәрдә 19 җәмәгать киңлеге төзекләндерелде. Башкарылган эшләрне финанслауның гомуми күләме 5,3 млрд сум, ә объектларның мәйданы – 42 гектар тәшкил иткән.

««Яшәү өчен инфраструктура» милли проекты ярдәмендә быел өстәмә финанс чаралары алырга мөмкин булды. Безнең планнар турында Игорь Игоревич Сәләхетдинов (мөхәррир иск. – тышкы төзекләндерү комитеты рәисе) хәбәр итте. Бу, беренче чиратта, Серов урамындагы бульвар, без аны СИБУР белән партнерлыкта эшлибез», – дип билгеләде Илсур Метшин.

Исегезгә төшерәбез, Серов урамында беренче инклюзив бульварны төзү 2023 елда әзерлек эшләреннән: субайлар кагу, бетон эшләре һәм инженерлык челтәрләре өчен нигез элементларын салудан башланды. Узган ел бульварның 1,7 гектар мәйданлы беренче участогын төзекләндерү төгәлләнде.

Быел анда тагын 1 гектар диярлек – тукталыш мәйданчыгыннан алып сулыкка кадәр территория төзекләндереләчәк. Биредә ишарәләр теле буенча шөгыльләнү зоналары, җәмәгать яшелчә бакчасы, су белән уен мәйданчыклары, урман зонасы һәм аз хәрәкәтле кешеләр өчен махсус велосипед юлы барлыкка киләчәк.

«Бульварны проектлаганда инклюзия мәсьәләсе буенча масштаблы әзерлек эшләре башкарылды: без башка шәһәрләр тәҗрибәсен өйрәндек, Казан инвалидлар җәмгыятьләре, сәламәтлек мөмкинлекләре чикләнгән кешеләр белән эшләүче хәйрия фондлары вәкилләре белән фикер алышулар һәм очрашулар уздырдык», – дип сөйләде Игорь Сәләхетдинов. Бульварны төзекләндерү буенча алдагы планнарга багышланган иҗтимагый фикер алышу узган айда булды.

Территориядә СИБУР ярдәме белән шулай ук 80 кв.м мәйданлы күпфункцияле павильон төзү планлаштырыла. Аны бульварның беренче участогы белән чиктә урнаштырачаклар. Павильонда экологик агарту буенча чаралар үткәрү планлаштырыла, шунда ук сәламәтлек мөмкинлекләре чикләнгән кешеләр өчен махсуслаштырылган велосипедлар прокаты өчен бина бүлеп бирү планлаштырыла.

«Компанияләр төркеменең социаль җаваплы сәясәт алып баруы бик мөһим – без үзебезнең партнерлык мөнәсәбәтләре турында бер генә тапкыр сөйләшмәдек. Компания үз заводлары эчендә бик күп эшли, коллектив өчен эш шартларын яхшырта, сәнәгать куркынычсызлыгын камилләштерә. СИБУР компаниясе җитештерүнең шәһәр экологиясенә технологик йогынтысын киметү буенча гаять зур эш башкара. Чыннан да, эш зур. Без аларның белем бирү проектларына игътибар бирүләрен дә хуплыйбыз һәм һәрьяклап куәтлибез. Бу төзекләндерү генә түгел, балаларга экологик тәрбия бирү буенча павильон төзергә җыеналар. Шулай ук компаниянең андагы зур булмаган күлне экологик реабилитацияләүдә катнашуына өметләнәбез. Һәм тиздән, бу сезонда, без анда эшләрне төгәлләргә өметләнәбез», – диде Илсур Метшин.

 Шулай ук компаниянең анда булган зур булмаган күлне экореабилитацияләүдә катнашуына өметләнәбез. Һәм тиздән, бу сезонда, без анда эшләрне төгәлләргә өметләнәбез", - диде Илсур Метшин.

«Яшәү өчен инфраструктура» милли проекты буенча быел шулай ук Акчарлак күлләрен төзекләндерү дәвам итәчәк: Кече күлдә урамда эскәмияләр, чүп савытлары һәм балалар зонасы өчен элементлар урнаштырылачак, ә Зур күлдә урамда тагын бер күзәтү мәйданчыгы барлыкка киләчәк.

Берничә ел эчендә күлләр тирәсендәге 3,5 га территория төзекләндерелгән. Элегрәк ул ташландык хәлдә, чүп үләннәре белән капланган, чүп-чар белән тулган һәм анда керү мөмкин булмаган диярлек. Бүгенге көндә Кече Акчарлак күле тирәсендәге территория республикада пациентлар өчен генә түгел, ә барлык халык өчен дә уңайлы булган беренче хастаханә яны паркы булып тора. Зур Акчарлак күле территориясендә төзекләндерү эшләре узган ел төгәлләнде.

Быел Миславский урамындагы скверда да төзекләндерүләр үткәреләчәк. Фонтанны реконструкцияләү, җәяүлеләр сукмакларын яңадан салу, өстәмә яктырту үткәрү һәм территорияне яшелләндерү планлаштырыла.

Г.Камал исемендәге яңа театр төзелү белән бергә, янәшәсендәге 7,8 гектар мәйданда узган ел паркка нигез салынды. Биредә театр бакчасы, ял итү зоналары, вакыйгалар мәйданчыгы, җәяү йөрү юллары һәм су буендагы пирс барлыкка килде. Республика акчаларына быел балалар паркын төзеп бетерү планлаштырыла. Бүгенгә 0,5 гектар мәйданда территория вертикаль планлаштырылган, сукмаклар өчен нигезләр бетонлаштырылган һәм инженерлык челтәрләре салынган.

«Без җәйге сезон башына планнарыбызны төгәлләячәкбез. Анда бик күп нәрсә калмады –кече архитектура формалары, яшелләндерү, төзекләндерү. Театр үзе генә түгел, аның тирәсендәге төзекләндерелгән территория дә шәһәр кешеләрен һәм башкала кунакларын җәлеп итәр дип өметләнәбез», – диде Илсур Метшин.

Территориядә урман фонтаны, су уеннары һәм театр эффектлары зонасы, япмалы ял итү урыннары һәм тактиль сукмаклар барлыкка киләчәк. Шулай ук территорияне масштаблы яшелләндерү дә үткәреләчәк. «Мәйданчык элементлары тематик яктан Түбән Кабан күле фаунасы белән бәйле булачак. Җирле кошлар сыннары – соры челән һәм чомга барлыкка киләчәк», – дип ачыклык кертте Игорь Сәләхетдинов.

Быел Татарстан башкаласы урамнарында 18 меңнән артык агач утыртылачак. Барлыгы 15 ел эчендә шәһәрдә 822 мең агач һәм 670 мең куак барлыкка килгән. Барлык үткән еллар дәвамында ел саен җәй көне 920 мең кв.м чәчәклек җиһазландырылган.