И.Метшин: «Бөтен илдән йөгерүчеләр җыела торган Казан марафоны – бу безнең өчен аерым горурлык»

(Казан шәһәре KZN.RU, 15 нче май, Татьяна Марюхова). Татарстан башкаласында җәйге спорт сезоны башланды. Казан марафоны, пляж һәм җилкәнле спорты буенча ярышлар, триатлон, шулай ук яшь футболчылар һәм баскетболчылар арасында ярышлар уздыру планлаштырылган инде. Быел барлык спорт чаралары Казанда 27 нче Бөтендөнья җәйге Универсиада уздырылуга ун ел тулуга багышлана. Бу хакта эшлекле дүшәмбедә Казан Башкарма комитетының Физик культура һәм спорт комитеты рәисе Линар Гарипов хәбәр итте.

«Безнең инфраструктура кыш та, җәй дә тик тормый. Бөтен илдән йөгерүчеләр җыела торган Казан марафоны – бу безнең өчен аерым горурлык», – диде Казан Мэры И.Метшин. 

Казан марафоны 27 нче һәм 28 нче майда узачак, анда ел саен 10 меңнән артык шәһәр халкы һәм кунаклары катнаша. «Бу – шәһәрнең төп истәлекле урыннары буенча йөгерү экскурсиясе. 42, 21, 10 һәм 3 км дистанция маршрутлары матур урыннар буйлап узачак һәм профессионалларга һәм йөгерергә яратучылар өчен булачак йөгерү сезонына заряд алу өчен яхшы мөмкинлек бирәчәк», – дип аңлатты Линар Гарипов. 

Ә иртәгәдән «Алтын алка» бөтенроссия турнирының дүрт яшь төркемендә ярышлары башланачак, аларның нәтиҗәләре буенча финалистлар билгеләнәчәк. Казан бөтен илдән 16 команданы кабул итә. 

18 нче майда Спорт сараенда олимпия чемпионы, дөнья чемпионы, 2 тапкыр Стэнли Кубогы иясе, Гагарин Кубогы иясе Павел Дацюк, «Ак Барс» хоккей клубы уенчысы, юниорлар арасында дөнья чемпионы, 2 тапкыр Гагарин Кубогы иясе Кирилл Петров һәм башка танылган хоккейчылар катнашында турнирның финал уеннары һәм гала-матч узачак. 

Казан данын 2008 елда туган балалар уйнаучы «Ак бүре» командасы якларга тиеш. Шәһәр Мэры аларга уңышлар теләде һәм ярышларны оештыручыларга мөрәҗәгать итте: «Мин спорт комитетыннан да, район башлыкларыннан да балаларыбызга теләктәшлек күрсәтүләрен сорыйм. Бу өйдә диварлар да ярдәм итәргә тиеш очрагы, шулай ук җанатарлар ярдәме», – диде шәһәр башлыгы. - Шулай ук Казан һәм вакыйга истә калсын өчен балалар өчен спорт бәйрәме оештыруны сорыйм. Без актив һәм сәламәт максатчан балалар һәм яшьләр Казанга килүен, уку һәм яшәү урыны итеп шәһәребезне сайлавын телибез». 

4 нче июньдә Татарстан башкаласы ел саен уздырыла торган йөгерергә яратучылар марафонына кушылачак – бөтен ил буенча 150 мең кеше бер үк вакытта «Забег РФ» стартына чыгачак. Ә 15 нче июльдә «Төнге Казан» йөгереше узачак, аның маршруты Кремль яр буе буйлап узачак. Катнашучылар бәйрәм атмосферасыннан гына түгел, ә төнге шәһәрнең матур күренешләре белән дә хозурлана алачак. 

«Казанда уза торган стартлар, матур урыннары аркасында, бөтен ил йөгерүчеләре өчен аеруча кызыклы. Без ял көннәрен гаиләбез, дусларыбыз белән спортта уздыру мөмкинлеген кулдан ычкындырмаска, беренче рәсми стартка чыгарга яки яңа шәхси рекорд куярга чакырабыз», – дип чакырды Л.Гарипов. Ул шулай ук йөгерү белән бәйле барлык чараларның юл хәрәкәтендәге үзгәрешләргә кагылачагын билгеләп үтте. 

Ел саен яшь футболчылар арасында «Күн туп» ярышлары башлана, анда 4 меңнән артык бала катнаша. 1 нче июньдә «Ракета» стадионында әлеге турнирның шәһәр этабы ачылачак. 

Ленар Гарипов 6 нчы майда Казансу елгасы акваториясендә «Җиңү җилкәннәре» ярышлары узуын, яңа җилкәнле сезонны ачуларын сөйләде. Казанда спортның әлеге төре буенча тагын берничә ярыш узачак, алар арасында шәһәр беренчелеге, Казан җилкәнле регатасы, Химград кубогы һәм төрле дәрәҗәдәге башка вакыйгалар. 

Казан Мэры якын арада җәмәгатьчеләр белән очрашу уздырырга, шулай ук шәһәрнең су инфраструктурасы мәсьәләләре буенча фикер алышырга кушты. «Мөгаен, без су спорт төрләренә һәм гомумән әлеге инфраструктурага аз игътибар бирәбез. Район башлыклары белән бу темага тәкъдимнәр әзерләүне сорыйм», - диде И.Метшин. 

12 нче августта, Физкультурачылар көнендә, казанлыларны һәм шәһәр кунакларын «Урам» экстрим-паркында, пляж спорт төрләре үзәгендә һәм «Хезмәт резервлары» стадионында зур спорт программасы көтә. Җәйге сезон дәвамында барлык урам мәйданчыкларында урам баскетболы буенча ярышлар узачак, ә аларның иң эресе 1 меңнән артык кешене колачлый торган «Кызгылт-сары туп» бөтенроссия баскетбол турниры булачак. 

Моннан тыш, җәй көне пляж спорт төрләре буенча ярышлар узачак: гандбол, волейбол һәм футбол. Ә муниципаль спорт мәктәпләре укучылары җәйге лагерьларда ял итәчәк, спорт сменалары шәһәр объектларында да узачак. 

9 нчы июльдә «Балалар лигасы» юниорлары арасында триатлон буенча Россия беренчелеге узачак, Ишкәкле спорт төрләре үзәгендә акватлон буенча Россия беренчелеге һәм «Триатлон лигасы. Балалар» бөтенроссия чарасы узачак. Август аенда Аккош күле урман паркында җәйге чемпионат һәм Казан беренчелеге узачак. 

Л.Гарипов шулай ук 16 торак комплекстан 3,5 меңнән артык шәһәр кешесен берләштерүче актив халык берләшмәсе белән хезмәттәшлек киңәюен хәбәр итте. Быел «Өй янындагы спорт» проекты киңәйтеләчәк, аның кысаларында ишегалларында тренерлар зарядка һәм тренировкалар үткәрәчәк.