Илсур Метшин Махсус Олимпиаданың «Бердәм уеннары» турында: «Безнең өчен бу бик җаваплы чара»

(Казан шәһәре KZN.RU, 23 нче гыйнвар, Юлия Летникова). Бүген Казанда Россия Махсус олимпиадасының «Бердәм уеннар»ының ярыш программасы башлана. Алар Россиядән һәм Беларуссиядән менталь бозылулар белән 2 меңнән артык атлетны һәм команда вәкилләрен берләштерде. «Безнең өчен бу җаваплы чара. Коллегаларның һәм уеннарны уздыру белән шөгыльләнүчеләрнең тәҗрибәсе аларны тиешле дәрәҗәдә уздырырга мөмкинлек бирер дип ышанам», – диде аппарат киңәшмәсендә шәһәр Мэры Илсур Метшин.

Кичә «Казан Экспо» халыкара күргәзмәләр залында «Бердәм уеннар»ны ачу тантанасы узды. Анда РФ спорт министры Олег Матыцин, Россия Махсус Олимпиадасы президенты Ольга Слуцкер, ТР Президенты Рөстәм Миңнеханов һәм шәһәр Мэры Илсур Метшин катнашты. «Бик матур тамаша. Анда катнашкан кунаклар үзләре дә сәламәтлек үзенчәлекләре белән иде, бу тантанага аерым бер атмосфера өстәде», - дип билгеләде шәһәр Мэры. «Ант бирү өчен чыккан спортчы кыз дулкынландыргыч сүзләр әйтте. Ул җиңәргә теләвен һәм беренче булырга тырышачагын билгеләп үтте, әмма сәламәтлек үзенчәлекләре булган спортчылар өчен стартка чыгу – инде җиңү, дип ассызыклады. Бу сүзләр алкышлар астында яңгырады», – дип уртаклашты И.Метшин.

«Бердәм уеннар» Казанда берничә ел элек булырга тиеш иде, әмма аларны оештыру пандемия һәм башка вакыйгалар белән бәйле рәвештә кичектерелде. «Барысы да үз урынына кайтыр, һәм без дөнья уеннары үзәге булырбыз дип ышанам», – диде Илсур Метшин. Соңыннан ул казанлыларны Казанда 26 нчы гыйнварга кадәр 8 кышкы һәм 10 җәйге спорт төре буенча узачак ярышларга чакырды.