Быел Казанда өч музыка мәктәбе ремонтланачак

(Казан шәһәре KZN.RU, 21 нче март, Алинә Бережная). Казанда «Яшь гвардия» спорт-сәламәтләндерү лагерена капиталь ремонт ясау дәвам итә: ашханәне ремонтлау бара, узган ел төзелгән ун яңа корпусның эчке эшләре алып барыла. Быел лагерьда клуб, медблок, контроль-үткәрү пункты, тышкы инженерлык челтәрләре, спорт мәйданчыклары төзеләчәк, шулай ук территорияне төзекләндерү эшләре башкарылачак. Социаль өлкә объектларын капиталь ремонтлау турында бүген эшлекле дүшәмбедә Казан социаль өлкә учреждениеләрен карап тоту һәм аларга хезмәт күрсәтү департаменты җитәкчесе Петр Королев сөйләде. 

Шулай итеп, быел Ленинград урамы, 26 адресы буенча урнашкан «Мотор» спорт мәктәбендә фасадны ремонтлау төгәлләнәчәк. Спорт учреждениесендә скалодром җайланмасы белән универсаль зал, дзюдо, бокс һәм футбол залы ремонтланган.

Шулай ук узган ел «Касатка» йөзү буенча спорт мәктәбендә капиталь ремонт эшләре төгәлләнде. Шуның белән бергә 113 нче номерлы мәктәп территориясендә урнашкан һәм административ-хуҗалык блогы өчен «Савиново» спорт мәктәбенә тапшырылган бина капиталь ремонтланды. 

Галимҗан Баруди урамындагы 2 нче номерлы музыка мәктәбендә эшләр дәвам итәчәк. Узган ел биредә беренче катны һәм концерт залын ремонтлаганнар. Петр Чайковский исемендәге 1 нче номерлы балалар музыка мәктәбендә дә ремонт дәвам итә. Юдино бистәсендәге 10 нчы номерлы музыка мәктәбендәге эшләр дә финишка якынлаша. Узган ел биредә ремонт эшләре төгәлләнгән, быел музыкаль инструментлар һәм җиһазлар сатып алуга 19,7 млн сум күләмендә акча бүленгән. Уңайлы шартларда 329 укучы яраткан эше белән шөгыльләнәчәк. 

«Капремонт музыка мәктәпләренә дә барып җитте. Өч мәктәпне бер үк вакытта ремонтлыйбыз. Һәрберсенең финишка кадәр үз дистанциясе бар, әмма без барлык эшләрне дә тәмамлаячакбыз», – дип билгеләде Казан Мэры Илсур Метшин.