«Иске шәһәр» территориясе префекты урынбасары Чехов исемендәге Мәскәү сәнгать театрына эшкә күчә

(Казан шәһәре KZN.RU, 14 нче февраль, Алинә Бережная). «Иске шәһәр» территориясе префекты урынбасары – оештыру эшләре һәм массакүләм мәгълүмат чаралары белән үзара хезмәттәшлек бүлеге башлыгы вазыйфаларын башкарган Ләйсән Мишарина Чехов исемендәге Мәскәү сәнгать театрында эшләячәк. Казан Мэры Илсур Метшин эшлекле дүшәмбе вакытында аны яңа билгеләнеше белән котлады һәм «Казан шәһәре файдасына башкарган мактауга лаеклы хезмәте өчен» аерым хөрмәтләү билгесен тапшырды.

«Гадәттә, без коллегаларыбызны хакимият органнарына яки РФ Дәүләт Думасына, республика, федераль министрлыкларга һәм ведомстволарга изге теләкләр белән җибәрәбез, ләкин бүгенге очрак аеруча үзенчәлекле. Безнең хезмәттәшебез – «Иске шәһәр» территориясе префекты урынбасары Ләйсән Шәүкәт кызы – Чехов исемендәге Мәскәү сәнгать театрына китә», – дип билгеләде Илсур Метшин. Аның сүзләренә караганда, узган елның октябрь азагыннан Чехов исемендәге Мәскәү сәнгать театрын җитәкләүче, РФ халык артисты Константин Хабенский үзе шәхсән Ләйсән Мишаринаның театрга эшкә күчүен сораган.

«Иҗади кешеләр күп, әмма оештыру эшләре белән идарә итә һәм шөгыльләнә алучылар да кирәк», – дип билгеләде И.Метшин.

Нәкъ менә Ләйсән Мишарина өч ел дәвамында Казанда Константин Хабенский белән берлектә оештырылган «Оперение» хәйрия фондын җитәкләде, дип искә төшереп үтте ул. Моңа кадәр Ләйсән Мишарина «Казан шәһәрендә 2013 елгы XXVII Бөтендөнья җәйге универсиадасы башкарма дирекциясе» автоном коммерцияле булмаган оешмасының социаль һәм мәдәни программалар департаменты директоры урынбасары һәм «Спорт проектлары башкарма дирекциясе» автоном коммерцияле булмаган оешмасының мәдәни программалар департаменты җитәкчесе урынбасары булып эшләгән.

Ләйсән Мишарина үз чиратында шәһәр башлыгына рәхмәт белдерде: «2006 елдан бирле без сезнең җитәкчелек астында бик зур проектлар эшлибез, аларга сез һәрвакыт ышанасыз. Тәҗрибәгез һәм ышанычыгыз өчен рәхмәт сезгә».