Илсур Метшин: «Без сезгә яланаяк йөрергә кушмыйбыз, ә бары тик кая гына керсәгез дә: транспортмы ул, бинамы, битлек киюегезне сорыйбыз»

(Казан шәһәре KZN.RU, 25-нче октябрь, Ксения Швецова). Казан Мэры Илсур Метшин шәһәр халкын үз сәламәтлекләрен сакларга һәм санитар-эпидемиологик таләпләрне үтәргә чакырды, шул исәптән битлек режимын да. «Бу хакта күпме сөйләргә була инде Без сезгә яланаяк йөрергә кушмыйбыз, ә бары тик кая гына керсәгез дә: транспортмы ул, бинамы, битлек киюегезне сорыйбыз. Бу шактый гади», – диде И.Метшин.

Кайбер шәһәрләрдә, Казанга караганда, катгыерак чаралар кертелде, дип билгеләде Мэр бүгенге эшлекле дүшәмбе вакытында. Мисал итеп ул Белгородны китерде, анда җәмәгать транспортын йөртүчеләргә, салонда бер генә  пассажир битлексез булса да, урыннарыннан кузгалу тыела. «Бу мәҗбүри чара, һәм безнең алай эшлисебез килми. Ахыр чиктә, хезмәт коллективындагы кешегә оят булырга тиештер бит! Әйдәгез, бер-беребезгә игътибарлы булыйк, – дип чакырды шәһәр башлыгы. –  Кискен респиратор-вируслы инфекцияләр, грипп яки коронавирус белән авыручы кеше битлек киеп, беренче чиратта, башкаларны яклавы турында белү өчен медицина университеты яисә көллияте бетерү мәҗбүри түгел бит. Сез балалар бакчасындагы балалар, ә без пионервожатыйлар түгел. Транспортта ничек булганын карагыз! Битлек кию авыр мени? Бу хакта күпме сөйләргә була соң инде?», – дип мөрәҗәгать итте шәһәрлеләргә И.Метшин.

Россия Президенты Владимир Путин яңа коронавирус инфекциясе таралу аркасында барлыкка килгән начар эпидемиологик вәзгыятькә бәйле рәвештә  30-нчы октябрьдән 7-нче ноябрьгә кадәрге вакыт аралыгын эшләми торган дип игълан итүен искә төшерде И.Метшин. Бу чорда шәһәрлеләргә үз сәламәтлекләрен сакларга, туганнары һәм якыннары турында кайгыртырга, өлкән буын вәкилләренә азык-төлек һәм дарулар китерүне тәэмин итәргә кирәк. «Бу хәлне уртак көч белән дә, дисциплина белән дә саклап калырга мөмкинбез, – дип ассызыклады Илсур Метшин. – Хәзер моннан да мөһимрәк мәсьәлә була алмый».

Исегезгә төшерәбез, Казанда һәм тулаем Татарстан буенча киеренке эпидемиология вәзгыяте саклана. ТР Сәламәтлек саклау министрлыгы хәбәр итүенчә, соңгы тәүлек эчендә республикада covid-19 авыруының 167 яңа очрагы ачыкланган, шул исәптән 104 очрак – Казанда.