«Казан - Яңа елда» туристлык индустриясе объектларын иң яхшы бизәү конкурсына йомгак ясалды

(Казан шәһәре KZN.RU, 16-нчы март, Алинә Бережная). «Казан - Яңа елда» туристлык индустриясе объектларын иң яхшы бизәү конкурсына йомгак ясалды. Тавыш бирү нәтиҗәләре буенча Щапов урамындагы «Лампа» кунакханәсе җиңү яулады. Конкурска барлыгы 60-тан артык гариза килгән. Бу хакта бүгенге эшлекле дүшәмбе вакытында Туризмны үстерү комитеты директоры Дарья Санникова хәбәр итте. Казан Мэры Илсур Метшин конкурста катнашучыларның барысына да шәһәрдә бәйрәм атмосферасы тудырганнары өчен рәхмәт белдерде.

Туризм объектларын иң яхшы бизәүгә конкурс 16-нчы декабрьдә старт алды. Ул туризм өлкәсендә үз эшчәнлеген гамәлгә ашыручы предприятие, оешма һәм индивидуаль эшкуарлар өчен үткәрелде, дип сөйләде Дарья Санникова. Конкурс шартлары буенча керү төркемен һәм бинаны Яңа ел стилендә комплекслы рәвештә рәсмиләштерү таләп ителгән иде.

Конкурста җиңүчеләрне Казан халкы, шулай ук жюри сайлады, аның составына шәһәрнең баш архитекторы Илсөяр Төхвәтуллина, баш рәссам Жанна Белицкая, Казан Башкарма комитеты җитәкчесе урынбасары - Тышкы төзекләндерү комитеты рәисе Игорь Куляжев һәм шәһәр администрацияләре башлыклары керде. Халык тавыш бирүе 2-нче февральгә кадәр KZN.RU порталында узды. Катнашучылар өчен үз тавышларын 5 мең кеше биргән.

Конкурс нәтиҗәләре буенча «Лампа» кунакханәсе җиңү яулаган. Шәһәр кешеләре дә, жюри әгъзалары да аңа өстенлек  биргән. «Жюри әгъзалары кунакханәне бизәүнең комплекслылыгын билгеләде», - дип ассызыклады Д.Санникова.

Шулай ук казанлылар Кремль яр буен, Kazan Palace by Tasigo һәм «Корстон», Казан Кремлен бизәүне югары бәяләгәннәр.

Илсур Метшин туриндустрия вәкилләренә катнашулары өчен рәхмәт белдерде, конкурста күп санлы предприятиеләр катнашуын билгеләп үтте. Шәһәр башлыгы ассызыклаганча, шәһәрдә тулы бер команда Яңа ел кәефен булдырган. «Быел шәһәрне бизәүгә социаль учреждениеләр, идарәче компанияләр, кече һәм эре бизнес вәкилләре зур көч куйды. Шәһәрдә бәйрәм атмосферасы булдырылды, аны халык та, башкала кунаклары да бәяләде. Киләсе Яңа елны көтәбез, шәһәр тагын да матурланыр дип өметләнәм», - дип йомгаклады И.Метшин.