И.Метшин: «Без кайчандыр капиталь төзекләндерелгән юллар турында хыялланган идек, ә менә хәзер алардан велоузышчылар узар»

25 июньнән 29 июньгә кадәр Казанда беренче тапкыр шосседа велосипед спорты буенча Россия чемпионаты узачак. Чемпионнар титулы өчен төрле дисциплиналарда илнең 200 иң көчле узышчысы көрәшәчәк. Узышлар Татарстан Республикасы башкаласында һәм Иннополис шәһәрендә узачак. Бу хакта бүген шәһәр башкарма комитетында аппарат киңәшмәсендә Казан спорт комитеты рәисе Линар Гарипов сөйләде.

«Без дөнья чемпионатларының, зур ярышларның Казанда узуына күнеккәнбез. Моның өчен бездә кирәкле бөтен инфраструктура булдырылган. Әмма велоспорт буенча Россия чемпионатына килгәндә – бу вакыйга бездә беренче тапкыр узачак, ул шәһәрнең бизәге булачак. Кайчандыр без капиталь төзекләндерелгән юллар турында хыяллана идек, алар буенча җәмәгать транспорты, шәхси автомобильдә тоткарлыксыз йөриячәк дип, ә менә хәзер алар буйлап велоузышчылар үтәчәк. Бу безнең юлларның югары сыйфаты турында сөйли», – дип билгеләп үтте Казан мэры Илсур Метшин.

28 июньдә Казанда төркем ярышлары узачак, спортчылар 123 км дан артык юл үтәчәк. 29 июньдә 171 километр озынлыктагы ир-атлар арасында төркем ярышлары узачак. Төркем узышында спортчының уртача тизлеге сәгатенә 50 километрга кадәр артачак.

Маршрут Үзәк стадионнан старт ала һәм шәһәрнең төп истәлекле урыннары аша узачак.

Ярышлар трансляциясе «Матч ТВ» спорт телеканалында оештырылачак, төшерү традицион нокталардан да, вертолеттан да алып барылачак.

Чемпионатта Россиянең танылган спортчылары чыгыш ясар дип көтелә. Петр Рикунов – Россиянең хәзерге чемпионы, халыкара ярышларда җиңүче. Лев Гонов – тректа рекордчы, халыкара ярышларда җиңүче. Тамара Дронова – тректа Европа уеннары призеры, халыкара класслы спорт мастеры, Токио һәм Парижда Олимпия уеннарында катнашучы.

Велоузышлар буенча Россия чемпионаты уздыру вакытында Казанның кайбер үзәк урамнары буенча хәрәкәт вакытлыча чикләнәчәк.

Хәзерге вакытта үсеш алган спорт инфраструктурасы ярдәмендә велоспорт күп кенә казанлылар өчен тормышның аерылгысыз өлеше булып тора. Казанның 20 заманча велоюл озынлыгы 64 километр тәшкил итә.