Казанда яшәүчеләрнең мөрәҗәгатьләре буенча җылылык бирү системаларында температураны әкренләп киметәчәкләр

(Казан шәһәре KZN.RU, 10 нчы апрель, Юлия Летникова). Казанда әлегә җылылык бирү сезонын тәмамлау планлаштырылмый, әмма шәһәр халкының күпсанлы мөрәҗәгатьләре аркасында җылыту системаларында температура әкренләп төшәчәк. Бу хакта Татарстан башкаласы Мэры Илсур Метшин Башкарма комитеттагы аппарат киңәшмәсендә җиткерде.

Ул билгеләп үткәнчә, узган атнада шәһәрдә апрель аенда урта полосага хас булмаган аномаль җылы һава торышы булган. Исегезгә төшерәбез, уртача тәүлеклек температура нормадан 10 градуска артык булды, температура рекордлары теркәлде.

«Бу уңайдан интернет-кабул итү бүлмәсенә һәм башка элемтә каналларына җылытуны сүндерү үтенече белән күп мөрәҗәгатьләр килде. Ләкин шәһәрнең җылылык бирү хуҗалыгы һәм үзәк җылыту – самовар да, кухнядагы утны сүндерү төймәсе дә түгел, бер басу белән генә сүндерелми. Бигрәк тә без һава торышы фаразын беләбез, хәтта бүген төнлә дә температура минус иде», – диде шәһәр башлыгы.

«Без җылылык белән тәэмин итүчеләргә җылылык температурасын әкренләп киметүләрен сорап мөрәҗәгать иттек. Җылылыкны этаплап сүндерәчәкбез, ә әлегә температура режимын киметәбез», – дип өстәде ул.

Игътибар итегез, 5 көннән артык уртача тәүлеклек һава температурасы +8 градустан артып китсә, җылылык бирү тәмамланачак.