2023 елда Казанда 1,2 млн кв.м торакны файдалануга тапшырырга ниятлиләр

(Казан шәһәре KZN.RU, 27 нче февраль, Диана Жиленкова). 2022 елда ТР башкаласында 874 мең кв.м торак файдалануга тапшырылган. Быел 1 млн 250 мең кв.м тапшыру планлаштырыла. Төрле программалар буенча 1647 гаилә үз торак шартларын яхшырткан, шул исәптән 1260 ы – социаль ипотека программасы буенча. Алданган өлешчеләр проблемасы да хәл ителде, дип хәбәр итте ТР Рәисе Рөстәм Миңнеханов катнашында Ратушада узган Казан шәһәр Думасының XXI сессиясе барышында шәһәр Мэры Илсур Метшин.

«Кызганычка каршы, шул ук вакытта сәламәтлек мөмкинлекләре чикләнгән кешеләрнең торак шартларын яхшырту ихтыяҗларын канәгатьләндерә алмавыбызны танырга кирәк, – дип игътибарны юнәлтте И.Метшин. - Күп фатирлы йортларның иске проектлары да, заманча проектлары да адаптацияләнгән торакка ихтыяҗны тәэмин итми». Мэр сүзләренчә, ТР Дәүләт торак фонды белән берлектә шәһәрнең Киров районында беренче адаптацияләнгән йортны төзү мөмкинлеге турында фикер алышалар.

Тагын 90 авария хәлендәге күпфатирлы йорт җимерелергә тиеш

2022 елда 2019-2023 еллардагы авария хәлендәге торактан күчерү буенча муниципаль адреслы программа вакытыннан алда тәмамланган. Аңа 51 йорт кертелгән булган. Яңа фатирларга 503 гаилә күчкән.

Шул ук вакытта тагын 91 күпфатирлы йорт авария хәлендә дип табылган. 1269 бинадан 2802 кеше күчерелергә тиеш, дип ассызыклады И.Метшин. Ул аңлатканча, бу йортлар гамәлдәге программага кермәгән, чөнки алар 2017 елның 1 нче гыйнварыннан соң авария хәлендә дип танылган.

«Татарстан Республикасы Министрлар кабинеты белән берлектә без әлеге карарны эшлибез һәм, хөрмәтле Рөстәм Нургалиевич, бу мәсьәләдә сезнең ярдәмегезгә ышанабыз», - дип мөрәҗәгать итте Рәикә ТР Мэры.

10 ел эчендә 14 мәктәп, 5 өстәмә уку корпусы һәм 91 балалар бакчасы төзелгән

Татарстан башкаласы миллион халкы булган шәһәрләр арасында мәгариф учреждениеләре төзү буенча алда бара, дип билгеләп үтте шәһәр башлыгы. Әйтик, 10 ел эчендә Казанда 14 мәктәп, 5 өстәмә уку корпусы һәм 91 балалар бакчасы төзегәннәр.

Хәзер Рауис Гәрәев һәм Сибгат Хәким урамнары буенча тагын 2 мәктәп төзелә. Салават Күпере һәм «Светлая долина»да 2 мәктәп буенча әзерлек эшләре башланды. Адоратский урамында ике балалар бакчасы төзеләчәк. Шулай ук Кол Гали урамындагы 18 нче гимназия янында яңа корпус пәйда булды. «Яшь гвардия» спорт-савыктыру лагерен реконструкцияләү дәвам итә.

2022 елда Рауис Гәрәев урамында хәрби госпиталь ишекләрен ачты, ә Һади Такташ урамында «Юстиция кварталы» барлыкка килде.

«Спартак» фабрикасы урынында IT-белгечләребез өчен чын мәгънәсендә сарай – Бәшир Рәмиев исемендәге IT-парк төзелде – заманча архитектура чишелешләре белән башкала үзәгенең чын бизәге. Барыбыз исеменнән Рөстәм Нургалиевичка бөтен бу объектларны булдырганда даими ярдәм һәм шәхси инициатива өчен рәхмәт белдерәсем килә», - диде И.Метшин.

Метрополитенның икенче линиясенең беренче участогында, «Фучик» станциясеннән «Сахаров» станциясенә кадәр, төзелеш дәвам итә. Дәрвишләр бистәсендәге балалар поликлиникасы филиалында да төзелеш бара.

«Яңа девелоперлык проектлары эшләтеп җибәрелә. Ташландык сәнәгать мәйданчыклары танымаслык булып үзгәрә. Порт урамындагы территорияне реновацияләүгә старт бирелде. Казанның төзелеш тармагы 100% эш белән йөкләнгән. Шуны да искәртәсем килә, бер төзүче 10-12 төрдәшнең эшен тәэмин итә», – дип нәтиҗә ясады Мэр.