Милли музыка мәдәниятен саклап калу турында бүген Казан консерваториясендә фикер алыштылар

(Казан шәһәре KZN.RU, 28-нче сентябрь). Милли музыка мәдәниятен саклап калу безнең өчен зур әһәмияткә ия. Бүген бу хакта Татарстан Республикасы Президенты Рөстәм Миңнеханов  Татарстан Композиторлар бергәлеге һәм Н.Г.Жиһанов исемендәге Казан дәүләт консерваториясе вәкилләре белән очрашуда хәбәр итте. Чарада ТР Президенты Аппараты җитәкчесе Әсгать Сәфәров, Казан Мэры Илсур Метшин, ТР Президенты ярдәмчесе Ләйлә Фазлыева һ.б. катнашты.

Очрашу Казан дәүләт консерваториясенең Большая Красная, 35 адресы буенча урнашкан яңа уку бинасында узды. Объектны капиталь төзекләндергәннән соң биредә берьюлы ике факультет ачылган – халык кораллары һәм татар музыка сәнгате факультетлары.

Рөстәм Миңнеханов яңарту эшләренең нәтиҗәләре белән танышты. Уку бүлмәләрен, репетиция залларын карап чыкты, аерым классларга кереп чыкты, шулай ук консерваториядә укучылар белән сөйләшеп торды.

Республика музыка җәмәгатьчелеге белән әңгәмәсендә Рөстәм Миңнеханов милли мәдәниятне һәм гореф-гадәтләрне саклап калу эшенең мөһим булуын билгеләп үтте.

“Бу бик мөһим миссия. Татар музыка мәдәниятенә ярдәм күрсәтергә, халкыбыз музыка коралларында уйнау буенча югалган традицияләрне торгызырга кирәк. Әгәр без аларны хәзер югалтсак, шушы мирасыбызны торгызу өчен ун мәртәбәдән артыграк акча кирәк булачак”, - диде Татарстан Республикасы Президенты.

Ул билгеләп үткәнчә, бүген Татарстанда музыкаль белемнең нәтиҗәле системасы корылган: мәктәп – училище – консерватория. Республика бу өлкәгә төрлечә ярдәм күрсәтәчәк, дип белдерде Рөстәм Миңнеханов. “Әмма төп эш сезнең җилкәләргә төшә. Без биналар мәсьәләсендә ярдәм итә, кирәкле җайланмалар белән тәэмин итә алачакбыз, иң мөһиме – эчтәлек өлеше. Монда бу эш әйбәт барганын күрәбез”, - дип мөрәҗәгать итте ул консерватория җитәкчелегенә.

Н.Г. Жиһанов исемендәге Казан дәүләт консерваториясе ректоры Рубин Абдуллин хәбәр иткәнчә, халык кораллары һәм татар музыка сәнәгате факультетлары эшчәнлеге нигезендә милли мирасны һәм сәнгатьне саклап калу һәм үстерү идеясе ята. “Милләтләр һәм конфессияләр арасында килешү саклап калырга мөһим булган хәзерге дөньяда – бу эш перспективаларга ия, дип уйлыйм”, - диде ул һәм Рөстәм Миңнехановка милли музыка сәнгате үсешенә керткән өлеше өчен рәхмәт белдерде, дип хәбәр итә ТР Президенты матбугат хезмәте.

“Рөстәм Нургалиевич, Сез безгә иң кирәк чакта ярдәм иттегез, – диде үз чиратында Россия һәм Татарстан Композиторлар берлеге рәисе Рәшит Кәлимуллин. – Соңгы иң билгеле композиторлар – безнең буын вәкилләре. Әмма хәзер Казан консерваториясендә бик талантлы яшь композиторлар белем ала, бу бик сөенечле күренеш”.