И.Метшин: «Казанлылар Конфедерацияләр кубогының беренче кунаклары булырга тиеш – бу суперфутбол булачак»

(Казан шәһәре KZN.RU, 7-нче ноябрь, Алсу Сафина). Иртәгә 8-нче ноябрь көнне Visa картасын кулланучылар ФИФА-ның рәсми сайтында Конфедерацияләр кубогы-2017 матчларына билетлар сатып ала алачаклар. Бу 17-нче ноябрьгә кадәр дәвам итә. 1-нче декабрьдә исә билетларны ирекле рәвештә сатып алып булачак. Казан Мэры Илсур Метшин казанлыларны Конфедерацияләр кубогының беренче һәм төп кунаклары булырга тиеш дип саный.

2017 елның 17-нче июненнән 2-нче июльгә кадәр үтәчәк ФИФА Конфедерацияләр кубогында дөнья чемпионы Германия, оештыручы ил - Россия җыелмасы, шулай ук барлык континентлар – Австралия, Чили, Мексика, Португалия һәм Яңа Зеландия чемпионнары катнашачак. Африка вәкиле 2017 елның февраль аенда билгеле булачак.

«Футбол яратучылар белән бергә шәһәр халкына да билетлар сатыла башлауга ук аларны алырга киңәш итәм, - дип мөрәҗәгать итте шәһәр башлыгы казанлыларга. - Турнирда катнаша торган җыелмаларны белдегез – мондый футболны күрү өчен кешеләр океан аша очалар. Безне супербәйрәм һәм суперфутбол көтә. Мондый хәлне тормышта бер тапкыр булса да күрергә кирәк. Бу онытылмас мизгелләр булачак. Мин шәһәребез халкының әлеге уникаль мөмкинлектән файдалануларын теләр идем».