Иҗат һәм спорт дөньясына юл: Казанның мәдәният һәм спорт йортларында «Ачык ишекләр көннәре» уздырыла

Шәһәр башлыгы өстәгәнчә, сәхнәбезнең бүгенге яшь йолдызлары, танылган артистларның барысы да диярлек иҗат юлын нәкъ шундый өстәмә белем бирү учреждениеләреннән, балалар иҗат йортларыннан башлаган.

«Шәһәр оешмаларындагы иҗат түгәрәкләренең күбесе бюджет исәбеннән финанслана, шуңа күрә хосусый үзәкләр белән чагыштырганда, әти-әниләр түләве бик аз яки бөтенләй юк. Бу очракта да сайлау хокукы әти-әниләрдә кала. Ачык ишекләр көне һәркемгә яшәгән урыны янында балаларның сәләтен һәм мөмкинлеген үстерү өчен тулы бер нигез булып тора», – дип йомгаклады сүзен мэр.

Булачак музыкантларны, актерларны һәм рәссамнарны 19 мәдәният йорты көтә

Иң беренче булып үз ишекләрен «Мәскәү» мәдәният үзәге ача. 2 сентябрьдә Урицкий исемендәге паркта зур таныштыру чарасы узачак. Биредә балалар студияләре тәкъдим ителәчәк, «Яшел компас» эко-мәктәбе һәм «Ура!» дип аталган рәсем сәнгате студиясе кызыклы гамәли дәресләр үткәрәчәк. Ә кич белән балалар эстрада студияләре катнашында зур концерт булачак.

3 һәм 11 сентябрь көннәрендә янәдән иҗат сезонын Ленин исемендәге мәдәният-ял комплексы ачып җибәрә. Бирегә килүчеләрне балалар коллективлары белән таныштырачаклар, ә фойеда ук ошаган түгәрәкләргә һәм секцияләргә язылу мөмкинлеге булачак.

Театр юнәлешләре белән исә 5 сентябрьдә танышырга мөмкин була. «Әкият» балалар үзәгендә урнашкан «Оперение» иҗади үсеш студиясе биш яшьтән өлкәнрәк балалар өчен «Дюймовочка» спектаклен күрсәтәчәк, ә тамашадан соң теләүчеләр шунда ук беренче дәрескә языла алачак. Шул ук көнне «Апуш» балалар татар театр студиясе Бауман урамындагы яңа бинасында 9 яшьтән 15 яшькә кадәрге балалар өчен зур сайлап алу үткәрәчәк.

Тагын берничә кызыклы чара 10 сентябрьгә планлаштырылган. «Нагорный» мәдәният йорты «Нәни принц» скверында күргәзмә чыгышлар һәм яңа катнашучыларны теркәү белән үрелеп барган «Айда!» акциясен оештырачак. Тимерюлчылар мәдәният сарае бина алдындагы мәйданда түгәрәкләр белән таныштыру, остаханәләр һәм бәйрәм концерты уздырачак. Шулай ук «Салават Күпере» паркында «Залесный» мәдәният үзәге үзенең иҗат коллективлары катнашында зур концерт программасын тәкъдим итәчәк.

13 сентябрьдә исә «Юность» мәдәният сараенда «Танго» бию-спорт клубының хисап концерты һәм «Коляскаларда бию» дип аталган яңа инклюзив юнәлешне тәкъдим итү чарасы узачак.

Яңа иҗат сезоны 1 сентябрьдән Казанның балалар музыка, нәфис сәнгать һәм сәнгать мәктәпләрендә дә башланып китә. Сентябрь башында берничә музыка мәктәбендә төрле белгечлекләр буенча буш урыннарга өстәмә кабул итү каралган. Төп кабул итү чорында гариза бирергә өлгермәгән балалар үз көчләрен сынап карый алачак. Тыңлауларны уңышлы узган очракта, алар сентябрьнең беренче атналарыннан ук укуларын башлаячак.

Футболдан алып триатлонга кадәр: шәһәр халкын 23 спорт мәктәбе көтә

Шәһәрнең спорт оешмалары да ачык ишекләр көне оештыра. Кызыклы программа спортның 32 төрен – футбол, хоккей, йөзү, триатлон, кикбоксинг, кыяга менү кебек һәм башка бик күп юнәлешләрне үз эченә ала.

Бу чаралар Казанның барлык җиде районында урнашкан 23 спорт мәктәбендә үткәрелә. Бирегә килүчеләр балаларны кабул итү шартлары, дәресләр җәдвәле һәм спорт юнәлешләре белән таныша, үзләренә туры килгән иң яхшы секцияне сайлый ала.

Беренчеләрдән булып, 1 сентябрьдә, Голубятников урамындагы яңа Кикбоксинг үзәге үз ишекләрен ача. Заманча җиһазландырылган бу спорт мәйданчыгы көн саен 180гә кадәр кешене кабул итә ала.

Чараларның тулы программасын һәм мәдәният, спорт оешмаларына язылу турындагы бөтен мәгълүматны Казанның Мәдәният идарәсе һәм Физик культура һәм спорт комитетының рәсми социаль челтәрләреннән табарга мөмкин.