И.Метшин 75 нче номерлы гимназиядәге ашханәне ремонтлау турында: «Монда хәтта диварлар да «сөйләшә торган»

(Казан шәһәре KZN.RU, 15 нче ноябрь, Диана Жиленкова). Казанның Мәскәү районындагы 75 нче номерлы гимназиянең быел азык-төлек блогы капиталь ремонтланган 30 гомуми белем бирү учреждениесенең берсе булды. Башкарылган эшләрдән соң ашау залында утырту урыннары саны 22 дән 110 га кадәр арткан. Бүген яңартылган ашханәдә шәһәр Мэры Илсур Метшин булып кайтты.

«Без ашханәләрне мәктәп рестораннарына үзгәртеп кора башлагач, уңайлылык, комфорт, туклану сыйфаты белән тәэмин итү бурычын куйдык, - дип ассызыклады шәһәр башлыгы. - Быел ашханәләрне тагын 30 мәктәптә яңарта алдык». 

160 кв. м мәйданлы азык-төлек блогын реконструкцияләүгә 8 млн сум каралган, шул исәптән 946 мең сумны Казанның Азык-төлек һәм социаль туклану департаменты җибәргән. Бу акчаларга ремонт эшләре башкарылган, яңа кухня җиһазлары сатып алынган. Ашханәдә утыру урыннары арткан, яңа җиһазлар пәйда булган, ә диварларны канатлы гыйбарәләр бизи. «Сез алга киттегез – монда хәтта диварлар да «сөйләшә торган», – дип билгеләде Мэр. 

«Безнең балалар хәзер ашханәдән чыкмый. Әгәр элек көндезге берләрдә бер кеше дә юк диярлек булса, хәзер безнең укучылар еш кына чәй табыны артында сөйләшәләр», - дип сөйләде 75 нче номерлы гимназия директоры Лариса Помыкалова. 

Казан Мэры пешекчеләр белән аралашты һәм гимназистларга төшке ашка нәрсә әзерләнгәнлеге белән кызыксынды. Бүген укучылар бифштекс, духовкада пешерелгән сыр белән капланган балык, тавык күкрәгеннән шашлык, дөге, макарон һәм башкаларны татып карый алдылар. Мәктәп укучыларына өстәмә рәвештә өчпочмак яки пицца кебек камыр ризыклары, десертлар – маффиннар һәм «корзинка» пирожные тәкъдим ителә. Шәһәр башлыгы игътибар иткәнчә, эчемлекләр арасында зарарлы газировка юк. 

Ашханәдән чыгуга, укучылар яңартылган ял итү зонасына эләгәләр, анда диваннар һәм өстәлләр урнашкан, биредә укучылар үзара аралаша һәм ял итә ала. Ә янәшәдә юынгычлар һәм көзгеләр урнаштырылган. «Һәр җәмәгать туклануы предприятиесендә дә болай чиста һәм матур түгел», - дип игътибар итте И.Метшин. Шулай ук шәһәр башлыгы гимназиянең спорт һәм актлар залларын карады. 

Бүген 75 нче номерлы гимназиядә 1 меңнән артык укучы белем ала. Педагогик коллективта 60 ка якын укытучы исәпләнә. Уку йорты үзе 1971 һәм 1961 елларда өзелгән ике бинага бүленгән, аларда өлкән һәм башлангыч мәктәпләр урнашкан. 

Беренче бинада (Гагарин ур., 101а) капиталь ремонт 2015 елда, икенчесендә (Гагарин ур., 26а) 2012 елда үткәрелгән. Быел гимназиядә укучыларның террорчылыкка каршы иминлеген тәэмин итү өчен җиһазлар урнаштырылды: контроль һәм керү белән идарә итү системасы, видеокүзәтү камералары, сак хезмәте өчен бина булдырылган. 

Исегезгә төшерәбез, бу уку елында Татарстан башкаласында 144 яңартылган мәктәп рестораны ачылды, бу ашханәләрнең гомуми саныннан 78% ын тәшкил итә. Җәй көне шәһәрнең 30 мәктәбендәге азык-төлек блогында ремонт эшләре узды, шулай ук 18 нче номерлы гимназиянең яңа корпусында ашханә дә төзекләндерелде. Соңгы дүрт елда ашханәләрне реконструкцияләү һәм мәктәпләр төзү хисабына ашханәләрдә утырту урыннары саны 7,7 мең берәмлеккә арткан.

Шәһәр Мэры белән гимназиядә Киров һәм Мәскәү районнары администрациясе башлыгы Сергей Миронов, Казанның Азык-төлек һәм социаль туклану департаменты директоры Рима Мөхәммәдшина һәм Башкарма комитетның Мәгариф идарәсе башлыгы Ирек Ризванов булды.