Илсур Метшин 40 ел эчендә беренче тапкыр капиталь ремонтланган 360 нчы номерлы прогимназиядә булып кайтты

(Казан шәһәре KZN.RU, 21 нче октябрь, Юлия Летникова). Яңа уку елына Казанның Яңа Савин районында Адоратский урамы, 8а адресы буенча урнашкан 360 нчы номерлы прогимназияне капиталь ремонтладылар. Эшләр тәмамланганнан соң учреждение заманча һәм уңайлы булды: биредә яңа спорт залы төзекләндерелде, мебель һәм җиһазлар тулысынча яңартылды, учреждение территориясендә чаралар үткәрү өчен сәхнә төзелде. Капиталь ремонт нәтиҗәләрен Казан Мэры Илсур Метшин бәяләп кайтты.

«Прогимназиядә заманча стандартларга һәм башкала дәрәҗәсенә туры килә торган бик яхшы шартлар тудырылган. Яңа шартларда, профессиональ педагоглар белән бергә, балалар үз сәләтләрен һәм талантларын тулысынча ачып бирә алачаклар», – дип билгеләде шәһәр башлыгы.

40 ел эчендә 2,6 мең кв. метр мәйданлы 360 нчы прогимназиянең ике катлы бинасында капиталь ремонт бер тапкыр да үткәрелмәгән. Учреждение директоры Лиана Сопромадзе сөйләгәнчә, бинаның фасадында эшләр башланганчы ярыклар булган, түбәдән су үткән, су басу сәбәпле подвал авария хәлендә булган. Моннан тыш, соңгы 6 ел эчендә учреждениедәге бассейн да эшләмәгән.

Эшчеләр капиталь ремонтка 1 нче июньдә керештеләр. «Экодом» ҖЧҖ подрядчы оешма директоры Нияз Ихсанов Мэрга грунт юдырылу сәбәпле подвалда су җыелганын, әлеге проблеманы хәл итү өчен эшчеләр нигез ташларын ремонтлаганнарын сөйләде. Белгечләр шулай ук түбә, фасад һәм керү төркемен яңарттылар, ишек һәм тәрәзәләрне алыштырдылар, керү контроле һәм идарә итү системасын тоташтырдылар һәм барлык бүлмәләрнең эчке бизәлешен башкардылар.

Якындагы территорияне төзекләндерү вакытында яңа асфальт җәелде, күләгә ясаучы япмалар урнаштырылды һәм чаралар үткәрү өчен сәхнә җиһазландырылды. Шулай ук кече архитектура формалары урнаштыру, волейбол һәм баскетбол өчен спорт мәйданчыгы булдыру, урман-парк зонасын төзекләндерү планнары да бар. «Әлеге эшләрне ноябрь уртасына кадәр төгәлләячәкбез», – диде Нияз Ихсанов.

Илсур Метшин медицина блогында, уку сыйныфында, азык-төлек блогында, спорт һәм актлар залларында, рәсем ясау студиясендә, балалар бакчасының ял итү бүлмәсендә булды, тәрбиячеләр, педагоглар һәм балалар белән аралашты. Шәһәр башлыгы дизайн-проектны һәм биналарны тулыландыруны югары бәяләде. «Проектны без дизайнерлар белән тандемда эшләдек, стеналарны бизәү концепциясе, төс карарлары һәм башка бик күп нәрсәләр – уртак эшебез», – дип билгеләде Лиана Сопромадзе. «Хәзер прогимназиядә үткән тормыштан бернәрсә дә калмады. Без мебельләрне, җиһазларны, акыл үсешен үстерә торган материалларны яңарттык», – дип өстәде ул.

Шәһәр Мэры яңа спорт залына да керде, биредә моңарчы эшләми торган бассейн урнашкан булган. Хәзер монда кече сыйныф укучылары өчен киенү-чишенү бүлмәләре, душ һәм спорт залы оештырылган.

Прогимназиядә капремонт белән бергә азык-төлек блогын һәм ашханә залын да яңарттылар, аерым алганда, суыткычлар, плитәләр һәм башка пешерү техникасын алыштырдылар. Учреждениедә барлык балалар кайнар аш белән тәэмин ителгән, алар өчен ашханәдә 60 утырту урыны оештырылган. «Сентябрьдән прогимназиядә ата-аналар контроле буенча 33 чара узды, журналда бары тик уңай бәяләр генә теркәлде», – дип хәбәр итте Казанның Азык-төлек һәм социаль туклану департаменты генераль директорының беренче урынбасары Дмитрий Зуев Илсур Метшинга.

Уку елы башына тәмамланган капиталь ремонт вакытында мәктәпкәчә яшьтәге балалар якындагы 5 уку йортына бүленде, ә сентябрь аенда укучылар белән бергә яңартылган учреждениегә кайттылар. Бүгенге көндә прогимназиядә 4 сыйныф һәм мәктәпкәчә яшьтәге балалар өчен 8 төркем оештырылган, шуларның 3 се сөйләм теле бозылган балалар өчен каралган. Казан Башкарма комитетының Мәгариф идарәсе башлыгы Ирек Ризванов билгеләп үткәнчә, прогимназия кебек белем бирү учреждениесе форматы балаларга бакчадан кече сыйныфларга уңайлы күчәргә мөмкинлек бирә. «360 нчы номерлы прогимназиядә капиталь ремонттан соң уңайлы класслар һәм бүлмәләр булдырылды, анда балалар сыйфатлы белем һәм тәрбия ала алачак», – дип ышанып әйтте ул.

Бүгенге көндә Казанның балалар бакчаларына 76,3 мең бала йөри, шул исәптән 1 яшьтән 3 яшькә кадәрге – 9,8 мең бала. Мәктәпкәчә белем бирү программасы 326 мәгариф учреждениесендә гамәлгә ашырыла: 312 балалар бакчасы, 11 мәктәпкәчә бүлекчәләре булган мәктәпләр, 2 гимназия һәм Дәвалау педагогикасы үзәгендә. Яңа Савин районында 46 балалар бакчасы, 360 нчы прогимназия, Дәвалау педагогикасы үзәге эшли.

Казан Мэры белән прогимназиядә Авиатөзелеш һәм Яңа Савин районнары администрациясе башлыгы Фәнис Нурмөхәммәтов, Социаль Казан учреждениеләрен карап тоту һәм аларга хезмәт күрсәтү департаменты директоры Петр Королев һәм башкалар булды.