Яңа ел бәйрәмнәрендә Казанның иҗтимагый киңлекләрендә 220 меңнән артык кеше булган

(Казан шәһәре KZN.RU, 15-нче февраль, Алинә Бережная). Яңа ел бәйрәмнәрендә Казанның иҗтимагый киңлекләрендә 220 меңнән артык кеше булган. Алар өчен паркларда һәм скверларда «Парклар янәшәдә» дигән кышкы бәйрәм программасы узган, аның кысаларында 96 төрле чара оештырылган. Кышкы сезонның нәтиҗәләре турында эшлекле дүшәмбедә шәһәр Башкарма комитетында «Парклар һәм скверлар дирекциясе» МБУ директоры Марат Закиров сөйләде.

«Парклар янәшәдә» бәйрәм программасы иҗтимагый киңлекләрдә 2020 елның 19-нчы декабреннән 2021 елның 11-нче гыйнварына кадәр узды. Шәһәр халкы өчен төрле чаралар – спектакльләр, бозда шуу, кар бабай бәйгеләре, ярышлар һәм башка чаралар оештырылган. «Без ял итүне кызыклы гына түгел, ә куркынычсыз да итәргә теләдек – барлык чараларны да Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәте идарәсе таләпләренә туры китерү өчен барлык чаралар күрелде», – дип ассызыклады Марат Закиров.

«Казан» гаилә үзәге янындагы үзәк чыршы шәһәр халкы арасында аеруча популяр булган, анда 135 меңнән артык кеше булган. Биредә сәүдә рәтләре, концерт программалары оештырылган.

Популяр ял итү урыннары арасында шулай ук «Черек күл»дәге шугалак та булды, анда яңа ел каникуллары вакытында 90 мең кеше килгән, алар социаль челтәрләрдә 5 меңнән артык фотография бастырылган. Марат Закиров билгеләп үткәнчә, быел шугалакта шуу сеанслары кертелгән – һәр сәгатьнең соңгы 15 минутында, барлык өслекләрне санитар чистарту һәм эшкәртү өчен, тимераяк бирү туктатылачак. Бу таләпләр бүген дә гамәлдә.

Бу кышта «Кышкы студия» күчмә музыкаль сәхнәсе зур популярлык казанган, анда Казан иҗат коллективлары чыгыш ясаган. 6 көн эчендә «Кышкы студия» 11 шәһәр локациясендә булган, ә аны 2,5 меңнән артык кеше тамаша кылган.

Шулай ук, Марат Закиров сүзләренщ караганда, шәһәр халкына Санкт-Петербургтан килгән урам театрының «Декаданс» перформансы белән чыгышлары ошаган. Тамаша җиде паркта узган, спектакльләрне 1,5 меңгә якын тамашачы караган.

«Бүген шәһәр паркларында һәм скверларында мәдәни-спорт чаралары дәвам итә, биш иҗтимагый киңлектә тренировкалар оештырыла, чаңгы ярышлары уза, аларны үткәрү өчен төп нокталар булып Горки-Әмәт урманы һәм Лебяжье урман паркы тора», – дип сөйләде Марат Закиров.

Казан Мэры Илсур Метшин ассызыклаганча, шәһәрдә кышкы программа югары дәрәҗәдә оештырылган, бу хакта шәһәр халкының уңай бәяләмәләре сөйли. «Быел паркларны реконструкцияләү буенча безнең эш нәтиҗәләре аеруча ачык күренде. Без парклар эше буенча бик күп яхшы бәяләмәләр алдык. Кешеләрнең гаиләләре белән җәмәгать киңлекләренә йөрүләре генә түгел, ә актив рәвештә чаңгы, тимераяклар, тюбингларда шуулары да мөһим»,– диде Илсур Метшин. Ул шулай ук бу юнәлештә эшнең дәвам итәчәген билгеләп үтте.