Казан Мэры Илсур Метшин паркларда сәүдә рәтләре булдырмаска чакырды

(Казан шәһәре KZN.RU, 15-нче февраль, Алинә Бережная). Казанда 21 парк территориясендә стационар булмаган сәүдә объектларын урнаштыру хокукына аукционнар старт алды. Җәйге сезонда шәһәр паркларында һәм скверларында 51 объект урнаштыру планлаштырыла. Казан Мэры Илсур Метшин паркларда сәүдә рәтләре булдырмаска чакыра.

«Килүчеләргә уңайлы һәм җайлы булсын өчен паркларда инфраструктураны үстерүне дәвам итү мөһим, әмма паркларны сәүдә рәтләренә әверелдерергә кирәкми, иң кирәклесе генә булырга тиеш», – диде Илсур Метшин һәм эшмәкәрләрнең сәүдә катнашында тигез мөмкинлекләр булырга тиешлеген дә өстәде.

Эшлекле дүшәмбедә «Парклар һәм скверлар дирекциясе» муниципаль бюджет учреждениесе директоры Марат Закиров сөйләвенчә, иң күп сәүдә нокталары Лебяжье күле пляжында - 9 данә, Горький исемендәге паркта һәм Горки-Әмәт урманында – бишәр объект, Урицкий исемендәге һәм «Сосновая роща» паркларында – дүртәр объект, өчәр объект – «Крылья Советов», «Континент» паркларында, «Казан» гаилә үзәге һәм Җиңү паркында, икешәр объект Сәетгалиев исемендәге мәдәният йорты янындагы паркларда, Мир урамында, Комсомол күлендә һәм «Ак чәчәкләр» бульварында ачылачак, һәм берешәр стационар булмаган сәүдә объектлары – «Кара күл» һәм «Калейдоскоп» паркларында, Лядской бакчасында, Аксенов исемендәге скверда, «Дубрава» урман-паркында һәм «Фестиваль» бульварында ачылачак. «Барлык аукционнар да диярлек 3 сезонга уйнатылачак. Исегезгә төшерәм, узган ел җәйге сезонга 3,5 млн сумлык 38 аукцион уйнатылды, аларның күбесе 2 елга», – дип сөйләде Марат Закиров.

Эшмәкәрләр өчен электрон аукционнарда катнашу буенча инструкция язылган мәгълүмати буклет эшләнгән. Буклетның электрон версиясе Парклар һәм скверлар дирекциясенең интернет-битендә урнаштырылган. Элеккеге кебек үк, торгларда юридик затлар, шәхси эшмәкәрләр һәм үзмәшгульләр катнаша ала. «Без элеккечә объектларның тышкы кыяфәтенә һәм контент эчтәлегенә югары таләпләр куябыз, ул Казанның Архитектура һәм шәһәр төзелеше идарәсе тарафыннан, татар телендәге элмә такталар һәм бәяләр булу белән килешенергә тиеш», – дип сөйләде Марат Закиров. Ул шулай ук билгеләп үткәнчә, хәзерге вакытта туңдырма, «Гриль-фест» һ.б. шундый гастрономия фестивальләрен уздыру турында килешү алып барыла. «Теге яки бу гастрономия фестивален үткәрүгә 30 көн кала, карар нигезендә, без үз сайтыбызда теләсә кайсы шәхси эшмәкәр, оешма яки гражданин катнаша ала торган ачык конкурс турында документация җибәрәчәкбез», - дип сөйләде Марат Закиров.

Шулай ук паркларда җәмәгать урыннарын контрольдә тоту эше дәвам итә, көн саен парк-менеджерлар территорияләрне урап уза, кар һәм боз җыю процессын контрольдә тота. Кече архитектура формаларын, балалар һәм спорт мәйданчыкларын торгызу, өслекләрне буяу һәм ремонтлау буенча ремонт эшләре инде апрельдә үк актив режимга күчәчәк. Шәһәр кешеләре мөрәҗәгате өчен +7(843)239-44-33 телефон номеры буенча кайнар линия эшли, шулай ук «Халык контроле» системасы яки Инcтаграм-аккаунт @park.kzn аша мөрәҗәгать итәргә мөмкин.

Быел, Марат Закиров сүзләренә караганда, Парклар дирекциясе Казансу елгасы ярын карап тоту һәм мәдәни тәэмин итү буенча эш башлаячак, «Салават күпере» торак комплексында парк төзелеше алып барылачак, паркларда яңа сервислар эшләячәк.