И.Метшин: «Дөньяны яхшыга үзгәртергә теләгән һәркемгә урын табылачак»

(Казан шәһәре KZN.RU, 17-нче август, Алена Мирошниченко). Казанда мәдәни үзәкләр һәм балалар сәнгать мәктәпләре җитәкчеләрен кадрлар резервына кертүгә конкурс игълан ителде. Кандидатларга 6-нчы октябрьгә кадәр шәһәр учреждениеләренең берсенең үсеш концепциясен әзерләргә һәм оештыру комитетына җибәрергә кирәк. Бу хакта бүген Татарстан башкаласы Башкарма комитетының эшлекле дүшәмбесендә Мәдәният идарәсе башлыгы Азат Абзалов хәбәр итте.

«Дәгъва белдерүчеләр югары белемле булырга, лидерлык сыйфатларына ия булырга, иҗтимагый һәм проект эшчәнлеге тәҗрибәсенә, карарлар кабул итүдә абруйга ия булырга һәм алар өчен җаваплылык тотарга тиеш. Идарә итү сәләте, командада эшли белү, шулай ук стратегик планлаштыру һәм партнерлар белән үзара хезмәттәшлек итү осталыгы аеруча югары бәяләнәчәк», – дип билгеләп үтте спикер.

Конкурс ике этапта узачак. Читтән торып уздырыла торган тур 21-нче августтан 6-нчы октябрьгә кадәр оештырылачак, урында уздырыла торганы – 11-нче ноябрьдән 30-нчы ноябрьгә кадәр. Читтән торып үткәрелгән этап кысаларында конкурсантлар оештыру комитетына Мәдәният идарәсе субпорталында урнаштырылган форма буенча резюме, шулай ук мәдәният яисә сәнгать мәктәбен үстерү концепциясен тәкъдим итәргә тиешләр. Концепция кирәкле критерийларга туры килергә тиеш: учреждение эшчәнлегенең тотрыклы уңай үзгәрешләренә ирешүнең нәтиҗәлелеге, максатларның һәм бурычларның актуальлеге, новаторлык характеры, максатчан аудитория белән эшләүнең оригиналь рәвешләрен үстерү һәм проектның реаль булуы. Моннан тыш, концепциядә учреждениенең гомуми күзаллавы, принциплары һәм эш формалары тәкъдим ителергә, потенциаль аудитория, программа тулылыгы һәм презентация материаллары күрсәтелгән булырга тиеш.

Кандидатларның тәкъдимнәрен мәдәни бергәлек вәкилләре, районнар администрацияләре башлыклары урынбасарлары, шулай ук Казан шәһәр Думасы депутатлары бәяләячәк, дип билгеләп үтте А.Абзалов.

Конкурста катнашу өчен документлар 21-нче августтан 6-нчы октябрьгә кадәр һәр сишәмбе көнне 14.00 сәгатьтән 18.00 сәгатькә кадәр Профсоюз урамы, 25 адресы буенча Мәдәният идарәсендә (206 каб.) кабул ителәчәк.

Мәдәният идарәсе башлыгы искә төшергәнчә, яңартылган «Мәскәү» мәдәни үзәге һәм ачылырга планлаштырылган Тимер юлчылар мәдәният йорты җитәкчеләре мондый конкурсларда җиңүчеләр булган.

«Теге яки бу вазифаны биләүгә конкурслар үткәрү практикасы безнең өчен яңа түгел. Ул үзен без беренче тапкыр «Мәскәү» мәдәният үзәге җитәкчесен сайлаганда яхшы яктан күрсәтте. Безнең өчен яңа кешеләрне ачу зур шатлык. Алар һичшиксез яшь булырга тиеш түгел – тәҗрибәле белгечләр дә килә. Без берничә тәкъдим алдык, аларның күбесе гамәлгә ашырылды, – диде Казан Мэры Илсур Метшин. Шәһәр башлыгы җиңүгә лаек булган барлык кешеләрнең дә диярлек, тик теге яки бу сәбәп буенча җиңүчеләр рәтенә эләкмәгән очракта, алга таба башка проектларга җәлеп ителүләрен җиткерде.

Шәһәр башлыгы Казан халкын конкурста актив катнашырга чакырды. «Без сезнең тәкъдимнәрегезне, идеяләрегезне, Казанда мәдәният үсешенә һәм башка юнәлешләргә иҗади энергиягезне кертүегезне көтәбез. Барлык концепцияләрне игътибар белән карарбыз. Казанда һичшиксез дөньяны яхшы якка үзгәртергә теләүчеләрнең барысына да урын табылачак», – дип йомгаклады И.Метшин.