Р.Миңнеханов һәм И.Метшин 131-нче лицейдагы читтән торып укыту системасы белән танышты

(Казан шәһәре KZN.RU, 19-нчы март). Бүген Татарстан Республикасы Президенты Рөстәм Миңнеханов Казанның 131-нче лицеенда булды, анда ул читтән торып укыту системасы белән танышты. Әлеге эш рәвеше коронавирус инфекциясе таралуны кисәтүгә бәйле рәвештә багланышларны киметү максатларында оештырылган.  

Рөстәм Миңнехановны Татарстан Республикасы Президенты Аппараты җитәкчесе Әсгат Сәфәров, Казан Мэры Илсур Метшин, Татарстан Республикасы Премьер-министры урынбасары – Татарстан Республикасы мәгариф һәм фән министры Рафис Борһанов, ТР дәүләт идарәсен цифрлы үстерү, мәгълүмат технологияләре һәм элемтә министры Айрат Хәйруллин, Роспотребнадзорның Татарстан Республикасы буенча идарәсе җитәкчесе – республиканың баш дәүләт санитар табибы Марина Патяшина озата йөрде.

Лицей директоры Әлфия Хәбибуллина хәбәр иткәнчә, бүген 703 укучы язгы каникулга киткән. «1-нче апрельдән без читтән торып укытуга күчәргә әзерләнәбез. Укытучыларны барлык платформалар белән дә таныштырдык, һәр укытучыда хәзер «Zoom» программасы бар, аның аша онлайн-дәресләр алып барырга мөмкин булачак», - диде ул.

Рөстәм Миңнеханов уку бүлмәләрендә булды, инглиз теле, геометрия, информатика буенча һәм Яндекс.Лицей. өстәмә белем дәресләре буенча читтән торып укытуны күзәтте. Рөстәм Миңнеханов укытучылар һәм укучылар белән сөйләшеп торды, элемтә сыйфаты белән кызыксынды, дип хәбәр итә ТР Президенты матбугат хезмәте.