Илсур Метшин Казахстан премьер-министры Әскәр Мамин белән очрашты

(Казан шәһәре KZN.RU, 10-нчы октябрь). Бүген Казан Мэры Илсур Метшин Нур-Солтанда Казахстан Республикасы премьер-министры Әскәр Мамин белән очрашты.

ТР башкаласы башлыгы һәм Казахстан премьер-министры социаль-икътисади үсешнең төрле өлкәләрендә хезмәттәшлек итү турында фикер алыштылар һәм киләчәктә уртак эш перспективаларын билгеләделәр. И.Метшин А.Маминга кунакчыллыклары өчен рәхмәт белдерде һәм шушы көннәрдә Казахстан башкаласы Нур-Солтан шәһәрендә үткәрелә торган чараларның югары дәрәҗәдә оештырылуын билгеләп үтте.

Исегезгә төшерәбез, 9-12 октябрь көннәрендә Нур-Солтанда Бөтендөнья туристлык оешмасының шәһәр туризмы буенча «Акыллы шәһәрләр, акыллы дестинацияләр»  VIII Глобаль саммиты уза. Анда Казан Мэры Илсур Метшин да катнаша, ул очрашуга кадәр «Акыллы шәһәрләр һәм туризм» темасына багышланган түгәрәк өстәлдә чыгыш ясаган иде. Саммит программасында - семинарлар, туризмның «акыллы» юнәлешләре турында панель дискуссияләр һәм дөньяның 80 иленнән 15 эре шәһәрнең мэрлары, чит ил эшкуарлары, архитекторлар, журналистлар, дәүләт һәм туристлык оешмалары вәкилләре катнашында башка чаралар.