Казан юлларының 80% артыгы норматив хәлдә

(Казан шәһәре KZN.RU, 26-нчы февраль, Ксения Швецова). Соңгы ике елда Татарстан башкаласында юл эшләренә 12,3 млрд. сумнан артык акча җибәрелгән, шул исәптән узган ел - 6 млрд.сум. Хәзерге вакытта шәһәрдә юлларның 81% норматив хәлдә, ә Универсиадага кадәр бу күрсәткеч 2 тапкыр кимрәк иде, дип билгеләде Казан шәһәре Думасының XXXII сессиясе утырышында Казан Мэры Илсур Метшин.

Шәһәр башлыгы хәбәр иткәнчә, 5-6 ел элек Казан юлларының сыйфаты шелтәләр тудырса да, бөкеләр җитди проблема булса да, бүген юлларның 81% норматив хәлдә. Россия Хөкүмәтенең социологик сораштырулары буенча, Казан юлларның торышы буенча рейтингта 2-нче урынны алды. "Мондый нәтиҗәләргә ТР Президенты Рөстәм Миңнеханов ярдәме белән ирешелде", - диде Мэр.

"Төзелгән һәм ремонтланган юлларны вакытында һәм сыйфатлы итеп җыештырырга, норматив хәлдә тотарга кирәк. Моны бездән казанлылар да үз мөрәҗәгатьләрендә таләп итә", - дип билгеләде И.Метшин һәм ел ахырына шәһәр юлларының җыештырыла торган мәйданы 21 млн квадрат метр тәшкил итте, дип өстәде.

Юлларны карап тоту сыйфатын саклау өчен узган ел җыештыру техникасы паркын яңарту эше дәвам итте - барлыгы 26 берәмлек махсус техника сатып алынды.

Узган ел шәһәрдә 122 шәһәр урамы һәм 60 бистә урамы, 14 бакчачылык ширкәтенә 3 керү юлы ремонтланган. Төзекләндерелгән юлларның гомуми мәйданы - 150 квадрат метрдан артыграк.