ТР Президенты Казанда яңа күп функцияле үзәкнең эшен бәяләде

(Казан шәһәре KZN.RU, 15-нче август). Бүген ТР Президенты Рөстәм Миңнеханов һәм РФ икътисади үсеш министры урынбасары Савва Шипов Казанда июль аенда ачылган, Җиңү пр., 214 адресы буенча урнашкан ТРда Дәүләт һәм муниципаль хезмәтләр күрсәтү буенча яңа күп функцияле үзәктә (МФЦ) булдылар.

Яңа үзәк 16 июльдә беренче кешеләрне кабул итте. Ул "Южный" һәм "Яңа Савин" бүлекләрен бушату өчен төзелде. 1,5 мең кв.м мәйданлы кабул итү залында 50 "кабул итү" тәрәзәсе эшли, көтү өчен уңайлы урыннар урнаштырылган, балалар почмагы, консультация мәйданчыгы оештырылган. Бу үзәктә барлыгы 120 төр хезмәт алып була. Күп функцияле үзәк ялсыз эшли.

Кунаклар үзәкне карап чыктылар. Рөстәм Миңнеханов яңа төр хезмәтләр белән танышты, дип хәбәр итә ТР Президенты матбугат хезмәте. "Монда бик уңайлы мохит тудырылганны күрәбез, - диде Савва Шипов. - Республикада күп функцияле үзәкләрне булдыру һәм әлеге мәсьәләгә бирелгән игътибар бик мөһим роль уйныйлар. Татарстан күп функцияле үзәкләрне булдыру һәм аларның сыйфаты буенча төбәкләрнең лидер төркемендә тора".

Чарада премьер-министр урынбасары - ТР мәгълүматлаштыру  һәм элемтә министры Роман Шәйхетдинов, ТР төзелеш,архитектура һәм ТКХ  министры Ирек Фәйзуллин,  Казан Мэры Илсур Метшин, Совет районы  администрациясе башлыгы Рөстәм Гафаров һ.б. катнашты.