(Казан шәһәре KZN.RU, 26-нчы декабрь, Алсу Сафина). Казанда
Яңа ел бәйрәмнәренә әзерлек вакытында куркынычсызлыкны тәэмин итүгә аерым
игътибар бирелә. РФ Эчке эшләр министрлыгының Казан шәһәре буенча идарәсе
җитәкчесе Алексей Соколов бүген үткән эшлекле дүшәмбе утырышында халык күпләп ял
итә торган урыннарга керү юлларын махсус конструкция белән җиһазландыру яки зур
йөк автомобиле техникасын кую мәсьәләсе каралуы турында җиткерде. Казан Мэры Илсур
Метшин барлык җитәкчеләргә һәм бизнес-бергәлекләргә янгынга каршы
куркынычсызлык чараларын үтәү буенча Гражданлык яклавы идарәсенең киңәшләренә игътибар
итәргә кирәклеген аңлатты.
“Күреп торабыз, Европада Раштуа бәйрәмнәре алдыннан моңарчы булмаган
чаралар күрелә. Игътибар итегез, Мәскәүдә кешеләрнең иминлеген саклау өчен
нинди өстәмә чаралар кабул ителә”, - диде шәһәр башлыгы бу елда соңгысы булган
аппарат киңәшмәсендә. – Башкарма комитеттагы барлык структур бүлекчә җитәкчеләрен,
шулай ук республиканың хакимият органнарындагы, федераль предприятиеләрдәге,
бизнес-бергәлектәге хезмәттәшләрен Гражданлык яклавы идарәсенең киңәшләрен үтәргә
чакырды. Мэр узган елда нинди генә чаралар күрелүенә дә карамастан, өч кешенең,
шул исәптән 8 яшьлек баланың пиротехниканы саксыз кулланудан зыян күрүләрен
искә төшереп үтте.
Гражданлык яклавы идарәсе җитәкчесе Фердинанд Тимерханов
Казанда яңа ел чаралары һәм раштуа бәйрәмнәре үтәчәк 424 мәйданчыкның барысы да
тикшерелүе турындагы мәгълүматны җиткерде. Алар янгынга каршы күзәтчелек
органнары тарафыннан тикшерелгәннәр һәм бәйрәм үткәрергә яраклы дип
табылганнар.
РФ Эчке эшләр министрлыгының Казан шәһәре буенча идарәсе
җитәкчесе Алексей Соколов Яңа ел төнендә җәмәгать тәртибен саклау өчен идарәнең
700 полиция хезмәткәре, шулай ук җәмәгать тәртибен саклау буенча муниципаль хезмәткәрләр
һәм Россия Милли гвардиясе гаскәрләре хәрбиләре җәлеп ителәчәге турында
җиткерде. Хәл катлауланып киткән очракта резерв булдырылган. Яңа ел һәм раштуа
чараларына әзерлек, аларны үткәрү вакытында Казан гарнизоны көчәйтелгән режимда
хезмәт итәчәк.
6-нчы гыйнвардан 7-нче гыйнварга каршы төндә Раштуа бәйрәме
уңаеннан Казанның 34 православие чиркәвендә Казан полициясенең 230 хезмәткәре сакта
торачак.
Озакка сузылган Яңа ел бәйрәмнәре вакытында җәмәгать
тәртибен һәм шәһәр халкының куркынычсызлыгын тәэмин итү эшенә меңнән артык
полиция хезмәткәре җәлеп ителәчәк.
“Халык күпләп ял итә торган урыннардагы барлык конструкцияләр,
аттракционнар һәм боздан эшләнгән корылмалар шартлаткыч җайланмаларның
барлыгын-юклыгын ачыклау өчен һәрдаим тикшерелеп торачак”, - диде Алексей
Соколов.
Шәһәрдәге чыршы мәйданчыкларына, ачылган көннән алып 14-нче
гыйнварга кадәр тәүлек дәвамында парлы пост куелачак, дип җиткерде идарә
җитәкчесе.