Казанда ике көнлек акция дәвамында 5 тоннадан артык макулатура җыелган

(Казан шәһәре KZN.RU, 10-нчы октябрь, Алсу Сафина). 5-6 октябрь көннәрендә Казанда узган экологик акция кысаларында 5 тоннадан артык макулатура җыелган: акцияләр Батурин, Дзержинский, Павлюхин һәм Ипподром урамнарында узган иде. Мэрия вәкилләре дә катнашкан чараның нәтиҗәләре турында бүгенге эшлекле дүшәмбе вакытында Башкарма комитет җитәкчесе урынбасары – ТКХ комитеты рәисе Искәндәр Гыйниятуллин сөйләп үтте.

Татарстан башкаласында акция ТКХ комитеты инициативасы белән “Чиста мохит” компаниясе белән булышлыгында оештырылды.

Макулатураның иң зур өлешен – 1 тоннадан артыгын – ТКХ комитеты тапшырды. И.Гыйниятуллин ассызыклап узганча, әлеге эш бүлекчәләрдә даими нигездә алып барыла, шуңа да яхшы нәтиҗәләр күрсәтелгән. 700 кг тирәсе макулатураны Финанс идарәсе тапшырган, 450 кг – “Идел буе районының идарәче компаниясе”. Макулатура җыюдан кергән акчалар хәйрия максатларына юнәлтеләчәк.

“Әлеге эшкә район администрацияләренең кушылуы кирәк. Халыкка ничек мәгълүмат җиткерергә кирәклеген, күчмә пунктның кайсы ишегалдына киләчәклеген уйлап бетерегез”, - дип чакырды шәһәр җитәкчесе. Макулатура җыю буенча күчмә мобиль пунктлар эше икенчел чималны селектив җыюга күчештә арадаш этап булырга мөмкин, дип саный ул.