Казан Мэры Илсур Метшин “300” уенының финал өлешенә старт бирде

(Казан шәһәре KZN.RU, 4-нче октябрь, Алсу Сафина). Бүген Казан Мэры Илсур Метшин Киров районындагы татар телендә белем бирә торган 4-нче гимназиядә булып кайтты, биредә Казанның “Рубин” футбол клубы символикасы төшерелгән һәм яңа гына ремонтланган спорт залында “300” уены финал өлешенең ябылу тантанасы булды. Шәһәр җитәкчесе сүзләренә караганда, әлеге проект илебездә генә түгел, бөтен дөньяда популяр уеннардан саналган футболны популярлаштыру максатыннан оештырылган.

Финал уеннарын башлау өчен урын юктан гына биредә сайланмаган – 4-нче номерлы гимназия бу елда уздырылган “Футбол яратучы иң яхшы класс” конкурсы җиңүчеләре исемлегенә керде. Гимназия укучылары конкурста актив катнаштылар һәм узган сезон матчларына бару буенча лидерлар бишлегенә кеределәр.

 “300” уены буенча турнир сентябрь башында башланды һәм өч төрле яшь категориясендә узды. Моның өчен ишегалларында һәм мәктәпләрдә “Рубин” стилендәге 40 капка урнаштырылды. 3-нче сентябрьдән 3-нче октябрьгә кадәр шәһәрнең һәр районында сайлап алу турлары узды, аларда 335 команда – 1000-нән артык кеше катнашты. Иң тиз уен 38 секунд булса, иң озын уен 1 сәгать тә 3 минут барды. “300” уены ярышларының йомгаклау этабына 24 команда чыкты. Барлык финалчыларга да бүләккә “Рубин” көндәлекләре тапшырылды.

 “Алтын көзнең шундый матур көнендә турнирның финал өлешендә катнашуыма шатмын, әлеге чара футболны популярлаштырырга тагы да булышыр дип ышанам”, - диде шәһәр җитәкчесе.

Мэр Казан шәһәр Думасы депутаты Дилүсә Сираҗетдиновага гимназиядәге спорт залын ремонтларга булышканы өчен рәхмәт белдерде. “Мондый залларның күбрәк булуы – безнең хыял”, - диде Мэр.

“300” уены финалы ачылышы тантанасында шулай ук Башкарма комитет җитәкчесенең беренче урынбасары Дамир Фәттахов һәм шәһәр районнары башлыклары катнаштылар.