Илгиз Фәхриев “Рубин” футбол клубының башкарма директоры итеп билгеләнде

(Казан шәһәре KZN.RU, 4-нче сентябрь, Зилә Гайфи). “Рубин” футбол клубының башкарма директоры итеп Илгиз Фәхриев билгеләнде. Кадр билгеләнеше турында бүген шәһәр Ратушасында журналистлар белән очрашу вакытында “Рубин” ФК президенты Илсур Метшин хәбәр итте.

Илгиз Фәхриев моңа кадәр Казан Башкарма комитетының Физик культура һәм спорт комитеты рәисе вазыйфасын башкарган иде. Илсур Метшин сүзләренә караганда, әлеге кеше “Рубин” футбол клубы, аның командасы һәм тренерлар штабы белән якыннан таныш. “Минем белән бергә клуб командасына тагы бер җитәкче килә. Башкарма дирекцияне Илгиз Фәхриев җитәкләячәк, ул әлеге командага таныш, шул исәптән уенчы буларак та. Илгиз Фәхриев төрле вазыйфаларда эшләде, Универсиада уздыруда һәм Спортның су төрләре буенча дөнья чемпионатын үткәрүдә дә катнашты. Аның тәҗрибәсе бар, һәм әлеге тәҗрибә клубка файдалы булачак”, - диде “Рубин” ФК президенты.