Плющенконың боз тамашасы, Нокса паркын ачу һәм музыкаль салют: казанлыларны Шәһәр һәм республика көнендә нәрсә көтә?

(Казан шәһәре KZN.RU, 21 нче август, Диана Жиленкова). Казанда Шәһәр һәм республика көнендә зур бәйрәм программасы әзерләнде. Вакыйгалар арасында Евгения Плющенко командасының боз тамашасы, Нокса яр буенда парк ачу, «Казан көзе» опера фестивале һәм башкалар көтелә. 30 нчы августта булачак чаралар турында эшлекле дүшәмбе барышында Башкарма комитет җитәкчесе урынбасары Гүзәл Сәгыйтова сөйләде.

«Шәһәрнең төп байлыгы – безнең кадерле кешеләребез, шул исәптән өлкән буын вәкилләре, алар үзләренең иң яхшы елларын, профессионализмын, рухын һәм йөрәген биреп, Казанны бүгенге дәрәҗәгә җиткерделәр. Шуңа күрә бәйрәм – барлык казанлыларга рәхмәт белдерү, аларга яхшы кәеф бүләк итү, балалары һәм оныклары, әби-бабалары белән гаиләләрне, бу көнне Республикабыз башкаласына киләчәк кунакларны чакыру ысулы», - дип ассызыклады Мэр Илсур Метшин.

Бу көнне Ратушада тантаналы шартларда шәһәр халкының казанышларын билгеләп үтәчәкләр, аларга федераль, республика һәм шәһәр бүләкләрен тапшырачаклар. Казанның мактаулы гражданнарын хөрмәтләү планлаштырылган.

«Без Казанның йөзе нәкъ менә туган шәһәребезне яраткан, хезмәт сөючән кешеләр икәнен аңлыйбыз. Бүген ТР башкаласын читтә дә яхшы беләләр, безгә кунакка гына түгел, туристлык максатларында да киләләр, шулай ук биредә белем алалар, биредә яшәргә калалар, гаиләләр булдыралар. Бүген Казанның нинди булуы – безнең уртак нәтиҗәбез», - дип билгеләп үтте шәһәр башлыгы.

1983-1986 елларда ТАССР Югары Советы президиумы рәисе Әнвәр Баһаутдиновка истәлегенә мемориаль тактаны 10:00 сәгатьтә Маяковский урамы, 19 адресы буенча йорт фасадында ачачаклар. Аны урнаштыру идеясе белән Татарстан Дәүләт Советы чыгыш ясады. Авторы – Россия Рәссамнар берлеге әгъзасы, скульптор Тимофей Тюрин.

«Светлая долина» торак комплексы территориясендә Нокса елгасы яр буенда күптән көтелгән парк ачылачак. Бәйрәм кунакларын концерт программасы көтә.

Төп спорт мәйданчыгы Горький исемендәге парк булачак. Биредә спорт мәктәпләрендә тәрбияләнүчеләрнең һәм спорт ветераннарының традицион җиңел атлетика кроссы, шахмат турниры, урында теркәлү белән спорт ориентирлашуы һәм городки буенча барлык теләүчеләр өчен ярышлар, 13 яшьтән 14 яшькә кадәрге егетләр һәм кызлар арасында 3х3 баскетбол буенча ярышлар узачак.

ТР Рәисе чакыруы буенча Казанга олимпия чемпионы Евгений Плющенко командасы киләчәк. Якыннары хәзер махсус хәрби операция зонасында булган гаиләләр өчен «Татнефть Арена»да илебезнең данлыклы фигуристлары катнашында «Чемпионнар берлеге» дип аталган ике боз тамашасы үткәреләчәк. Бозга танылган Россия фигуристлары чыгачак.

Яшьләр бәйрәм мәйданчыгы «УРАМ» экстрим-паркы булачак. Бу мәйданчыкта 10:00 сәгатьтән 22:00 сәгатькә кадәр шул ук исемдәге музыка фестивале узачак.

Г.Камал исемендәге театр каршындагы мәйданда 11:00 сәгатьтә «Уйнагыз, гармуннар!» фестивале старт ала. Аннан соң «Уйнагыз, гармуннар!» республика конкурсында катнашучыларның флешмобы башланачак. Колоритлы костюмнар кигән музыкантлар һәм артистлар гармун һәм курай аккомпанементы астында халык җырларын башкарачак һәм шәһәрнең үзәк урамнары буйлап Беренче Май мәйданына кадәр узачак.

12:00 дә Кабан күле яр буенда «Милли кием» фестивале ачылачак. Аңа теләге булган һәркем кушыла алачак. Катнашучыларны милли костюмнарда халык күңел ачулары көтә.

13:00 сәгатьтә Казан Кремле территориясендә Tat Cult Fest фестивале старт ала. Тамашачылар алдында Yummy music лейблының төп резидентлары һәм башка артистлар чыгыш ясаячак.

14:00 сәгатьтә Казан ипподромында ат спорты бәйрәме башлана. Программада чабышлар һәм заездлар, сәнгать осталарының концерт программасы каралган.

19:30да Игенчеләр сарае каршындагы мәйданда «Казан көзе» ачык һавадагы традицион опера фестивале ачылачак, ул маэстро Александр Сладковский җитәкчелегендәге ТР Дәүләт симфоник оркестры тарафыннан оештырылган. Кичәдә Россиянең атказанган артисткасы Агунда Кулаева һәм Зур театр солисты Алексей Татаринцев башкаруында классик әсәрләр яңгыраячак.

«Казан» гаилә үзәгендә бәйрәм программасы 12:00 сәгатьтә генерал-майор Виктор Елисеев җитәкчелегендәге Россия милли гвардиясе гаскәрләренең академия җыр һәм бию ансамбле чыгышы белән башлана, шуннан соң «Ак Барс» хоккей командасының яңа составын тәкъдир итү планлаштырыла.

17:00 дә программаны Казан шәһәр филармониясе солистлары, Ришат Төхвәтуллин, Гүзәл Уразова дәвам итәчәк. Концертның хедлайнерлары Клава Кока һәм Jony булачак. Яшь популяр башкаручының чыгышы – «Ак Барс» хоккей клубының шәһәргә бүләге.

22:00 сәгатьтә Казансу акваториясе өстендә музыкаль фейерверк җибәрәчәкләр. Музыканы ишетер өчен тамашачыларга 91,5 «Болгар радиосы» FM-дулкынын тотарга кирәк булачак. Трансляция ТНВ телеканалында планлаштырылган.

«Бәйрәм мәйданчыкларында азык-төлек товарлары, халык кәсепләре һәм сувенир продукциясе әйберләре белән күчмә сәүдә оештырылачак», - дип өстәде Гүзәл Сәгыйтова.