Илсур Метшин: «Аккош күлендәге фестивальнең үз йөзе бар – ул җирле товар җитештерүчегә юнәлдерелгән»

(Казан шәһәре KZN.RU, 21 нче август, Татьяна Марюхова). Казанда Аккош күлендә 26 нчы августта гастрономия фестивале ачылачак. Мәйданчыкта 35 тән артык резидент өчен фуд-корт, мастер-класслар, үзмәшгульләрдән ярминкә һәм «Смысловые галлюцинации» төркеме солисты Сергей Бобунец белән концерт оештырыла. Бу хакта эшлекле дүшәмбедә Казанның Киров һәм Мәскәү районнары хакимияте башлыгы Сергей Миронов хәбәр итте.

Илсур Метшин билгеләп үткәнчә, быел җәй җылы һава торышы саклана, ә җәйге верандаларга көндез дә, кичен дә ихтыяҗ бар.

«Гастрономия фестивальләре күп булмый. Ачык һавада дуслар, туганнар һәм кунаклар белән тәмле ризык ашау – ул һәрвакыт рәхәт. Бүген бездә 100 дән артык җәйге веранда бар, һәм бу шәһәр үзәгендә генә түгел. Казанның кухняда шундый күпмилләтле традицияләре һәм тәкъдимнәр палитрасы белән үз мөмкинлекләрен презентацияләүнең һәм клиентлар эзләүнең яңа формаларын табуы яхшы», – диде ул.

Фестивальдә ашамлыкларның киң спектрын тәкъдим итәчәкләр – француз сырларыннан алып Мексика бурритосына кадәр

Сергей Миронов сүзләренчә, мәйданчыкта мастер-класслар оештырачаклар, анда Казан рестораннары аш-су осталары халык белән берлектә җирле җитештерүчеләрдән ингредиентлардан ризыклар әзерләячәкләр. Мастер-класс рецептларның килеп чыгышы турында сөйләү белән үрелеп барачак.

Фуд-кортта 35 тән артык резидентның мобиль кухнялары һәм йортлары тәкъдим ителәчәк. Кунаклар төрле ризыкларны татып карый алачак: кыздырылган туңдырма, Мексика буритосы, татар милли ашлары, француз сырлары, үзбәк тәм-томнары. 

«Балаларга ашарга яраклы стаканнардагы шулпалар һәм шикәр мамыгындагы туңдырма истә калыр дип ышанам», – дип ассызыклады Сергей Миронов.

Күпбалалы гаиләләр фуд-кортта таныклык күрсәткән очракта 50% ташламадан файдалана алачак.

«Без алдагы фестивальләр тәҗрибәсен исәпкә алдык, килүчеләргә уңайлы булсын өчен зур тизлекле интернет үткәрү буенча эш алып барабыз. Бу кунакларга кәгазь акчаларсыз түләргә мөмкинлек бирәчәк», - диде спикер.

Җирле продукция дегустациясе, ретроавтомобильләр белән фотосессия һәм Сергей Бобунец чыгышы

Фестиваль кунаклары игътибарын ярминкә җәлеп итәчәк. Үзешчән һәм шәхси эшкуарлар интерьер һәм декор предметлары сатачак, ә республиканың 12 фермер хуҗалыгы һәм авыл хуҗалыгы кооперативлары натураль продукция тәкъдим итәчәк.

Нәни кунаклар өчен катамараннарда йөрү, ретроавтомобильләр фонында фотосессияләр һәм мастер-класслар оештырыла.

Музыкаль бизәлеш өчен С.Гобәйдуллина исемендәге заманча музыка үзәге оркестры, Роман Плеханов, AYN Project, Taurus, Zakaria этно-төркеме, солистлар Игнат Изотов, София Перес җавап бирәчәк. Чараның хедлайнерлары «Смысловые галлюцинации» төркеме лидеры Сергей Бобунец һәм Drummatix төркеме булачак.

Аккош күлендәге фестивальнең үз йөзе бар – ул җирле товар җитештерүчегә юнәлдерелгән. Әлеге чара аларга танылу китерер, яңа базарларга чыгарга һәм яңа җанатарлар һәм клиентлар яуларга ярдәм итәр дип өметләнәбез», – дип ассызыклады Илсур Метшин.

Гастрофест уздыру урынына шаттллар йөриячәк

Фестивальне уздыру көнендә 36, 36а, 46, 72, 116 нчы номерлы автобуслар хәрәкәтенең интенсивлыгы артачак. «Ремплер» тукталышыннан (Залесная урамы) махсус шаттллар йөриячәк, ә шәхси транспорт өчен машина кую урыннары каралган.

Җәяү йөрергә яратучылар фестиваль уздырыла торган урынга «Аккош күле» тукталышыннан күлләр каскады буйлап, күрсәткечләргә таянып бара алачак.

Шәһәр башлыгы куркынычсызлыкка һәм транспорт белән барып җитү мөмкинлегенә игътибар итәргә кушты. Ул узган ел парковканы төгәлрәк оештыру буенча теләкләр булуын искәртте.

Шәһәрлеләрне 10:00 сәгатьтән 19:00 сәгатькә кадәр Аккош күле урман паркы мәйданында көтәчәкләр, керү ирекле.

Исегезгә төшерәбез, узган ел фестиваль 30 меңнән артык башкала халкын һәм кунакларын, кече һәм урта эшкуарлык вәкилләрен, җәмәгать туклануы һәм фермерлык өлкәләрендә эшләүче үзмәшгульләрне берләштерде.