Модернизацияләнгән «Азино» котельнясы 140 мең казанлыны җылылык белән тәэмин итәчәк

(Казан шәһәре KZN.RU, 17 нче октябрь). Казанда «Азино» котельнясында өченче су җылыткыч казан эшли башлады. Аның төзелеше нәтиҗәсендә объектның җылылык егәрлекләре 100 Гкал/сәгатькә артты, бу микрорайонда яшәүче 140 мең кешене җылылык белән тәэмин итәргә мөмкинлек бирәчәк. Бүген объектта Татарстан Президенты Рөстәм Миңнеханов һәм Казан Мэры Илсур Метшин булды.

«Татэнерго» АҖ генераль директоры Рәүзил Хаҗиев сөйләгәнчә, актив төзелә торган Совет районында котельняны модернизацияләү 3,7 млн кв.метр җылытыла торган мәйданнарга өстәмә рәвештә 50 мең кеше өчен каралган 1,1 млн кв. метрны тоташтырырга мөмкинлек бирә. Котельняда модернизация барышында 280 тонна металл конструкцияләре, 105,7 км кабель, 8,5 км үткәргеч торба монтажланган, 3,5 мең кубометр бетон салынган һәм 28,3 мең кв.м территория төзекләндерелгән. 

Су казаннары, резерв ягулык хуҗалыгы, электротехника һәм ярдәмче җиһазлар заманча автоматлаштырылган идарә итү системасы белән җиһазландырылган. Бу котельняны үзәкләштерелгән контрольдә тоту, идарә итү һәм куркынычсыз куллануны тәэмин итү өчен эшләнгән.

«Азино» котельнясы 1987 елда шул ук исемдәге микрорайонны җылылык белән тәэмин итү өчен файдалануга тапшырылган. Җылылык йөкләнешенең алга таба үсүе белән бәйле рәвештә, 1994 елда икенче су җылыту казанын төзү тәмамланган.

Видеорепортаж