Меңьеллык паркында TatFuture цифрлы технологияләр гаилә фестивале башланды

(Казан шәһәре KZN.RU, 30 нчы август). Бүген Казанның Меңьеллык паркында TatFuture цифрлы технологияләр гаилә фестивале башланды. Ачылыш тантанасында Татарстан Президенты Рөстәм Миңнеханов, РФ төзелеш һәм торак-коммуналь хуҗалык министры Ирек Фәйзуллин, Казан Мэры Илсур Метшин, Дәүләт идарәсенең цифрлы үсеш, мәгълүмати технологияләр һәм элемтә министры Айрат Хәйруллин катнашты.

Оештыручылар халык өчен төрле активлык зоналары (медиаинсталляцияләр белән, цифрлы сәнгать павильоны, nft күргәзмәсе, VR/AR зонасы һәм робототехника) әзерләгән. Шулай ук фестивальдә блогерлар һәм цифрлы индустриянең әйдәп баручы экспертлары чыгышлары планлаштырылган. Кунаклар берничә тематик зонадан торган фестиваль мәйданын карадылар: мәгариф, сәнәгать, икътисад, медиа һәм башкалар, дип хәбәр итә ТР Президенты матбугат хезмәте. 

Рөстәм Миңнеханов татарстанлыларны Республика көне белән котлады һәм бәйрәмне оештыручыларга рәхмәт белдерде. «Бик кызыклы, эчтәлекле фестиваль. Без киләчәктә дә мондый чаралар белән шөгыльләнәчәкбез. Безнең тормыш рәвеше үзгәрә, цифрлы хезмәтләр безнең тормышка ныклап үтеп керде. Бүген республикада дәүләт хезмәтләре үсеше, безнең министрлыклар функционалын цифрлы форматка күчерү буенча җитди эш алып барыла. Бу эштә без, барыннан да элек, яшьләргә таянабыз. Бүген без яңа ИТ-парк ачачакбыз, анда талантлы яшьләр потенциалын үстерү өчен барлык кирәкле шартлар тудырылачак», – диде ул.

Видеорепортаж