Илсур Метшин КФУда юридик факультетның попечительләр советы утырышын уздырды

(Казан шәһәре KZN.RU, 26 нчы май). Бүген Казан федераль университетында башкала Мэры Илсур Метшин юридик факультетның попечительләр советының традицион утырышын уздырды.

Очрашуда совет әгъзалары узган уку елы нәтиҗәләре, юридик факультетның үсеш перспективалары, яңа проектлар турында фикер алышты. Университетның юридик факультеты деканы Лилия Бакулина 2021-2022 уку елында укытучыларның һәм студентларның белем бирү, фәнни һәм спорт казанышлары, шулай ук КФУда Юридик белем бирү һәм фәнне үстерү фонды эшчәнлеге турында сөйләде.

Мәгариф эшчәнлеге буенча декан урынбасары Ольга Чепарина советка юридик факультетның яңа белем бирү проектларын тәкъдим итте. КФУ юридик факультетының 70 еллыгына багышланган фәнни һәм мәдәни чараларга әзерлек турында деканның фәнни эшчәнлек буенча урынбасары Дамир Вәлиев сөйләде.

Утырышта шулай ук 2022-2023 уку елына попечительләр советының эш планын расладылар һәм совет составын яңарттылар, аңа «Нәфис» компанияләр төркеме директорлар советы рәисе Михаил Сыровацкий да керде.

Утырыш ахырында совет әгъзаларына Юридик факультетны тәмамлаучылар ассоциациясеннән китаплар тапшырылды.

Чарада шулай ук ТР Президенты Аппараты җитәкчесе Әсгать Сәфәров һәм ТР Премьер-министры урынбасары Роман Шәйхетдинов катнашты.