Ачык һавада йога һәм туңдырма фестивале: Казан паркларында һәм скверларында җәйге программа старт алды

(Казан шәһәре KZN.RU, 17-нче май, Ксения Швецова). Казанның иҗтимагый киңлекләрендә 15-нче сентябрьгә кадәр дәвам итәчәк чараларның җәйге программасы старт алды. Шәһәрлеләр һәм шәһәр кунаклары өчен мәгариф, экология, гастрономия, иҗади, тел, спорт һәм мәдәни проектлар әзерләделәр. Казанлылар биергә һәм төрле телләрдә сөйләшергә өйрәнә, шулай ук спорт белән шөгыльләнә, концертларда була һәм туңдырма белән сыйлана алачак. «Безнең стратегия иҗтимагый киңлекләр, парклар һәм скверлар, һәркем файдалана алырлык булудан гыйбарәт. Бу барлык кешеләр өчен дә тигез территоря, анда без төрле хезмәтләр спектрын тәкъдим итә алабыз», – диде бүген Казан Мэры Илсур Метшин эшлекле дүшәмбедә.

Йога, зумба, стретчинг һәм йөгерү буенча көндәлек күнегүләр

Җәйге программаның беренче зур вакыйгасы Горки-Әмәт урманында ел саен үткәрелә торган «Иҗтимагый бакча» проектын эшләтеп җибәрү булды. Ул дүртенче тапкыр гамәлгә ашырыла, дип искәртте Парклар һәм скверлар дирекциясе җитәкчесе Роберт Гарипов. «Шәһәр халкы белән бергә без чәчәкләр, яшелчә һәм җиләк-җимешләр утырттык, үзебезнең үсемлекләрне җәй буе караячакбыз, ә көз көне үз уңышыбызны җыячакбыз», – диде ул.

Парклар һәм скверларда спорт дәресләре башланды: шимбә көнне Горки-Әмәт урманында йөгерү клубы эшли башлады, ә иртәгә, 18-нче майда, Кабан күле буенда гадәттәге йога дәресләре башлана.

Паркларда зур спорт юнәлеше «Яшел фитнес» программасы белән бергә тормышка ашырылачак: шәһәрнең 10 паркы территориясендә һәр атна саен йога һәм стретчинг буенча тренировкалар, сулыш алу практикалары буенча дәресләр, көч, функциональ, йөгерү күнегүләре, зумба һәм башкалар узачак. Профессиональ инструкторлар һәм тренерлар чакырылган.

Моннан тыш, «Казан» гаилә үзәгенең күзәтү мәйданчыгында йога белән иртәнге дәресләр дәвам итәчәк, «Черек күл» паркында йөгерү клубы эшләячәк, медитация буенча дәресләр узачак.

Гастрофестивальләр: Горький паркында туңдырма һәм Кабанда гриль

Җәйге иҗтимагый киңлекләрне еш кына гастрономия фестивальләрен кабул итәләр һәм үткәрәләр. Әйтик, Горки-Әмәт урманында «Гриль-фест» ашамлык фестивале 29-нчы һәм 30-нчы май көннәрендә 12:00 сәгатьтән 20:00 сәгатькә кадәр узачак. Ә июльдә Горький исемендәге үзәк паркта зур туңдырма фестивале узачак.

«Дирекция бу җәйге сезонда яңа проектларны да башлап җибәрергә планлаштыра: балалар һәм өлкәннәр өчен белем бирү мәктәбе, авыл хуҗалыгы маркеты, архитектура курслары, сувенирлар кибете, экскурсияләр сериясе, шәһәр балалар эколагере, фудтрак-шәһәрчек, музыкаль джаз кичәләре һәм башка бик күп проектлар, – дип сөйләде Р.Гарипов. – Без шәһәрдә калган яки безгә килгән кунаклар якты тәэсирләр алырлык булсын өчен бөтен җәйге сезонга бай программа эшләргә тырышабыз».

Балаларны яклау көне: тәрбия турында лекцияләр һәм бию мастер-класслары

Халыкара балаларны яклау көнен быел берничә форматта үткәрү планлаштырыла. «Соңгы вакытта вакыйгалар чираттагы тапкыр психологик сәламәтлек, төрле юнәлешләр буенча белгечләргә ярдәм итү һәм ярдәм итүнең мөһимлеген күрсәтә, – дип билгеләде спикер. – Шуңа күрә 1-нче июньдә «Черек күл» паркында без балалар, яшүсмерләр һәм ата-аналар өчен зур лекцияләр үткәрәчәкбез».

«ЛизаАлерт» ирекле эзләү-коткару отряды, «Росток» психологик-педагогик тернәкләндерү һәм коррекция үзәге һәм лекцияләрдә профильле белгечләр белән тәрбия, яшүсмерләр проблемалары, балалар һәм ата-аналарның үзара мөнәсәбәтләре турында фикер алышачаклар. Тулы программаны @ park.kzn дирекциясенең рәсми Instagram-аккаунтында һәм Мэрия сайтында бәйрәмгә якынрак тәкъдим итәчәкләр.

5 һәм 6 июньдә «Калейдоскоп», Урицкий исемендәге һәм шәһәрнең башка паркларында мастер-класслар, биюләр, җырлар, иҗат коллективлары чыгышлары белән үткәрелә торган традицион балалар бәйрәмнәре узачак.

Тел клубы һәм милли киемнәрдә Кабан буйлап йөрү

Р.Гарипов сүзләренә караганда, Татарстан Республикасында Туган телләр һәм халыклар бердәмлеге елы кысаларындагы чараларга аерым игътибар бирү планлаштырыла.

Ялларда Кабан күле яр буенда татарча тел клубы эшли башлады, ул инде икенче җәй барлык теләүчеләр өчен ачык. Шулай ук яр буенда җирле башкаручыларның татар телендәге концертлары, пластика буенча күнегүләр һәм дәресләр, «татар сансетлары» – паркларда зур булмаган музыкаль диджей-сетлар, Идел буе халыкларының милли мәдәниятен өйрәнү буенча бию мастер-класслары планлаштырылган, дип хәбәр итте Парклар һәм скверлар дирекциясе җитәкчесе.

«Августта Кабан күле яр буенда икенче «Милли кием» фестивален үткәрү планлаштырыла. Исегезгә төшерәм, узган ел без Шәһәр көнен һәм Республика көнен бәйрәм итүнең яңа шәһәр традициясен тәкъдим иттек – Кабан буйлап милли киемнәрдән йөрү», – диде Р.Гарипов.

Казан Мэры шәһәр халкы өчен чараларны иң югары дәрәҗәдә оештырырга кушты.