Д.Чернышенко һәм Р.Миңнеханов Су спорт төрләре сараенда һәм «Искәндәр» футбол-регби манежында булды

(Казан шәһәре KZN.RU, 6-нчы март). Бүген Казанга эш сәфәре кысаларында РФ Хөкүмәте рәисе урынбасары Дмитрий Чернышенко «Искәндәр» футбол-регби манежында булды. ТР Президенты Рөстәм Миңнеханов белән бергә ул спорт объектлары инфраструктурасы белән танышты.

Чарада шулай ук Казан Мэры Илсур Метшин, ТР спорт министры Владимир Леонов, Идел буе дәүләт физик культура, спорт һәм туризм академиясе ректоры вазифаларын башкаручы Рафис Борһанов һәм башкалар катнашты.

РФ вице-премьеры FINA су спорт төрләрен үстерү үзәге һәм 2025 елгы FINA су спорт төрләре буенча дөнья чемпионатын уздыруда катнашачак объектлар белән танышты. Турнир 2015 елгы чемпионаттан соң 10 ел узгач Татарстан башкаласына кайтачак. 

Дмитрий Чернышенко билгеләп узганча, Казан алдынгы спорт башкалаларының берсе буларак халыкара ярышларны беренче тапкыр гына кабул итми. «Бу чемпионат нәрсә белән уникаль? Әзерлек кысаларында Су спорт төрләренә ярдәм итү үзәге оештырылуы белән. Монда башка илләрдән спортчылар шөгыльләнә, һәм бу хезмәттәшлек һәм партнерлыкның бер төре. Без үз мөмкинлекләребез белән уртаклашабыз, – дип билгеләде РФ вице-премьеры. – Монда без дөнья чемпионатын әзерләү кысаларында теләсә кайсы зур ярышларны үткәрү нигезендә калдырылган мирас яткан модель эшләвен күрәбез».

«Искәндәр» футбол-регби манежында Дмитрий Чернышенко «Стрела» регби клубы уенчылары һәм тренеры белән очрашты. Чуйков урамындагы спорт объектын 2020 елның сентябрендә ачтылар. Ул чишенү бүлмәләре, тренажер залы, көтү зонасы, медицина блогы һәм кыр зурлыгы 108х51 метрлы бер катлы бина булып тора.

Спорт объектларыннан тыш, Дмитрий Чернышенко Татарстан башкаласына эш сәфәре кысаларында яңадан торгызыла торган Казан Изге Ана иконасы соборында һәм Казан федераль университетының Геология һәм нефть-газ технологияләре институтында булды, дип хәбәр итә ТР Президенты матбугат хезмәте.

Фоторепортаж

Видеорепортаж