Рөстәм Миңнеханов төзүче компанияләр вәкилләре белән очрашты

(Казан шәһәре KZN.RU, 18-нче февраль). Бүген Татарстан Республикасы Президенты Рөстәм Миңнеханов Казан һәм Биектау районы территориясендә үз эшчәнлеген алып бара торган эре төзүче компанияләр вәкилләре белән чираттагы очрашуны уздырды. ТР Хөкүмәте Йортында узган очрашуда РФ Төзелеш һәм торак-коммуналь хуҗалык министрының беренче урынбасары Ирек Фәйзуллин, ТР Премьер-министры Алексей Песошин, Казан Мэры Илсур Метшин, ТР Төзелеш, архитектура һәм торак-коммуналь хуҗалык министры Фәрит Хәнифов, «ТР Президенты каршындагы Дәүләт торак фонды» коммерциягә нигезләнмәгән оешмасының башкарма директоры Марат Зарипов, Биектау муниципаль районы башлыгы Рөстәм Кәлимуллин һәм башкалар катнашты. Рөстәм Миңнеханов агымдагы елда һәм киләчәктә 2024 елга кадәр торак тапшыру буенча төзелеш компанияләренең планнарын тыңлады. Исегезгә төшерәбез, бу вакытка Татарстанга торак төзелешенең еллык күләмен 3,6 млн.кв. метрга кадәр арттырырга кирәк. Төзүчеләр төзелеш тармагының эскроу-счетлар механизмына күчүенә бәйле сорауларын бирделәр, шулай ук төзелешнең үзкыйммәтен киметү буенча кайбер чаралар тәкъдим иттеләр, бу базарда ихтыяҗның артуына ярдәм итәчәк, дип хәбәр итә ТР Президенты матбугат хезмәте. Республика башлыгы, үз чиратында, төзелеш компанияләренең барлык тәкъдимнәре РФ Дәүләт Советының торак өлкәсен үстерү буенча эш төркеме кысаларында федераль дәрәҗәгә җиткереләчәк, дип билгеләп үтте. Исегезгә төшерәбез, эшче төркемне Татарстан Президенты җитәкли.