Казанда кискен респиратор вирус инфекциясе һәм грипп белән авыручылар саны эпидемия чигеннән 19% ка кимрәк

22 сентябрьдән 28 сентябрьгә кадәр Татарстан башкаласында грипп һәм кискен респиратор вирус инфекциясенең 7 мең очрагы теркәлгән, бу 38 нче атна белән чагыштырганда 19% ка кимрәк. Узган атнада кискен респиратор вирус инфекциясе теркәлгән очракларның гомуми санында грипп өлеше 0,9% тәшкил иткән. Эпидемик хәл начарайган очракта, шәһәрнең медицина оешмаларында госпиталь базасының әзерлеге тулысынча тәэмин ителгән. Бу хакта эшлекле дүшәмбедә ТР ССМ Казан буенча Сәламәтлек саклау идарәсе башлыгы вазыйфаларын башкаручы Гөлнара Гайфуллина хәбәр итте.

Бүгенге көндә Казанда 431 мең 535 кешегә грипптан прививка ясалган, шуларның 184 меңе – балалар. Медицина оешмаларына җитәрлек күләмдә «Совигрипп», «ФлюМ», «Утрикс квадри» вакциналары микъдары керде. Препаратлар халыкара стандартларга җавап бирә. Агымдагы эпидемия сезонында барлыгы 823 мең кешегә, шул исәптән 204 мең балага вакцина ясатырга кирәк.

Гриппка каршы прививка ясатырга теләүчеләр яшәү урыны буенча поликлиникага мөрәҗәгать итә алалар. Вакцинацияне бушлай һәм алдан язылмыйча үткәрәләр. Медицина оешмасының эш урыннарында хезмәткәрләрне вакциналаштыру өчен 418 мобиль прививка бригадасы әзерләнгән.

«Көз салкын белән генә түгел, вируслы авырулар белән дә килә. Сәламәтлек саклау идарәсенең прививка кампаниясе буенча мәгълүмат һәм киңәшләрен җиткерүегезне сорыйм, вакыт әле мөмкинлек бирә. Аерым игътибар – күп санлы эшләүчеләр тупланган сәнәгать предприятиеләре җитәкчеләре. Предприятиеләрнең икътисадый күрсәткечләре кебек үк, хезмәткәрләрнең сәламәтлек торышы да мөһим. Яхшы хезмәткәр – сәламәт хезмәткәр. Әйдәгез, табиблар киңәшен тотыйк», – дип билгеләп үтте аппарат киңәшмәсендә Казан мэры Илсур Метшин.

Моннан тыш, 3 сентябрьдән 30 сентябрьгә кадәр метро станцияләре янында алты вакцинация пункты җәелдерелгән. Барлыгы 18 мең 348 кешегә прививка ясалган. Моннан тыш, пневмококк инфекциясенә каршы 60 яшьтән өлкәнрәк 1543 кешегә вакцина ясалган. Сайлау участокларында 14 сентябрьдә 89 мобиль прививка бригадасы эшләде. Барысы 3930 кешегә прививка ясатканнар.

Прививка ясату кампаниясе быел 29 июльдә башланып китте. Башта иң зәгыйфь төркемнәрне вакциналаганнар. Алар арасында: 6 айлык балалар, йөклелекнең 2 нче һәм 3 нче триместрында йөкле һәм медицина хезмәткәрләре.

Грипп йоктыру куркынычы зур булган төркемнәргә укучылар һәм мәгариф һәм медицина оешмалары, шулай ук сәүдә, транспорт, коммуналь һәм социаль өлкә предприятиеләре хезмәткәрләре һәм башка затлар керә. Алар барысы да үзләренең һөнәри эшчәнлекләре буенча күп санлы кешеләр белән элемтәдә торалар.

«Гриппка каршы ел саен прививка ясатырга киңәш ителә, Бөтендөнья сәламәтлек саклау оешмасының киләсе елга актуаль штаммнар турындагы фаразы нигезендә вакцинаның штамм составы ел саен яңартыла. Бүген кулланыла торган вакциналар составына әлеге эпидемия сезоны өчен көнүзәк булган штаммнар керә: А гриппының ике варианты һәм B гриппының бер варианты», – диде докладчы.

Кискен респиратор вирус инфекциясе билгеләре булганда шәһәр халкын өйдә калырга һәм үз-үзегезне дәвалау белән шөгыльләнмәскә сорыйлар. Иң яхшысы врачны өйгә чакыру. Шулай ук респиратор этикет һәм кул гигиенасын сакларга, иммунитетны сакларга кирәк.