Казан укучыларының ата-аналары шәһәр яны лагерьларында балаларның ялы өчен кешбэк ала алачак

(Казан шәһәре KZN.RU, 24-нче май, Алинә Бережная). Быел ата-аналар шәһәр яны лагерьларында балаларның ялы өчен кешбэк ала алачак. Ил Хөкүмәтенең тиешле карары узган атна ахырында чыкты. Казан Мэры Илсур Метшин эшлекле дүшәмбедә шәһәр Башкарма комитетында субсидия бирүнең яңа мөмкинлекләрен җентекләп өйрәнергә кушты. «Ата-аналарның проблемалары булмавы мөһим», – дип ассызыклады ул.

Ил Президенты Владимир Путин карары буенча узган елда эшләнгән туристик кешбэк федераль программасына ил буйлап сәяхәт иткәндә акчаларның бер өлешен кайтаруны күздә тота, моңа бу җәйдән балалар лагерьлары да өстәлгән. Казан балалар һәм яшьләр эшләре комитеты рәисе Айрат Фәизов карар нигезендә хезмәт күрсәтү туроператорларның бердәм федераль реестрында булган юридик зат тарафыннан бирелергә тиеш, дип аңлатты. Хәзерге вакытта аңа бары тик ата-аналарга өстәмә комиссия тәкъдим итүче туристик компанияләр генә кертелгән. Бүген Ростуризм белән берлектә «Ял» үзәге кебек җәйге ял операторларын туроператорлар реестрына кертү механизмы эшләнә.

«Федераль коллегалар реестрга кертү өчен регламентны һәм таләпләрне әзерләүгә бер атна вакыт билгеләде», – дип хәбәр итте Айрат Фәизов. Регламентлар 25-нче майдан соң барлыкка килер дип көтелә.

Кешбэк алу өчен юллама сатып алучының картасы «Мир» лояльлек программасында сайтта теркәлгән булырга тиеш.

«Юлламаны 25-нче майга кадәр сатып алырга өлгергән ата-аналар, РФ дәүләт хезмәтләре порталында 15-нче июньнән соң, тиешле бүлектә рәсмиләштереп, кешбэк ала алачак», – дип билгеләп үтте Айрат Фәизов. Броньлаган, әмма юллама өчен түләмәгән кешеләр +7(843)590-24-82 телефоны буенча «Ял» шәһәр үзәгендә консультация ала алачак.