Илсур Метшин: «Балаларга каршы юнәлдерелгән террорлык акты – күз алдына китерергә мөмкин булганның иң кабахәте»

 Марат Мугинов

(Казан шәһәре KZN.RU, 11-нче май). Казан Мэры Илсур Метшин шәһәрнең 175-нче номерлы гимназиясендә гадәттән тыш хәл уңаеннан кайгы уртаклашуын белдерде.

«Бу бик зур фаҗига. Балаларга каршы юнәлдерелгән террорчылык акты – күз алдына китерергә мөмкин булганның иң кабахәте, иң түбәне. Йөрәкләребез бүген кызгану һәм кайгы белән тулы. 175-нче номерлы Казан гимназиясендә атыш нәтиҗәсендә һәлак булганнарның гаиләләренең, туганнарының һәм якыннарының кайгысын тирән уртаклашам. Зыян күрүчеләрнең барысына да тизрәк терелүләрен телим», – диде И.Метшин.

Искәртеп узабыз, 175-нче номерлы Казан гимназиясендә атыш нәтиҗәсендә сигез кеше үлде, шул исәптән җиде бала. 21 зыян күрүчене хастаханәгә озаттылар. 12-нче май Татарстанда матәм көне дип игълан ителде. Шулай ук иртәгә Казан мәктәпләрендә укулар булмаячак.

Россия Президенты Владимир Путин Казан мәктәбендә һәлак булганнарның туганнарының һәм якыннарының кайгысын уртаклашты.