Казанның Парклар һәм скверлар дирекциясен Роберт Гарипов җитәкләде

(Казан шәһәре KZN.RU, 1-нче март, Алинә Бережная). Бүген Казан парклары һәм скверлары дирекциясен Роберт Гарипов җитәкләде. Элегрәк ул «Иске шәһәр» территориясендә префект булган. Аның билгеләнүе турында бүгенге эшлекле дүшәмбе барышында Казан Мэры Илсур Метшин хәбәр итте. Ул Роберт Гариповның парклар һәм скверларны төзекләндерү өлкәсендәге тәҗрибәсен билгеләп үтте.

«Роберт Зөфәр улы Башкарма комитетта төрле вазыйфаларда һәм юнәлешләрдә эшли башлады, аннары карьерасын Түбән Камада дәвам итте, шәһәр һәм район башлыгы аппараты җитәкчесе булды, анда парклар һәм скверлар төзекләндерү буенча зур эш башланды», – дип ассызыклады Илсур Метшин. Ул яңа җитәкчегә эшләрендә уңышлар теләде, бүгенге көндә өстенлекле бурычлар арасында – Казансу елгасының үсеш стратегиясен гамәлгә ашыру кысаларында, Милли парк булдыру, дип билгеләп үтте.

Шәһәр башлыгы «Иске шәһәр» территориясе префекты вазыйфасына кандидатлар турында тәкъдимнәр кертергә кушты. «Иске Татар бистәсе бүген – болардан тыш, елга порты һәм Казан вокзалының реновациясе», – дип билгеләп үтте Илсур Метшин.

Исегезгә төшерәбез, элек Парклар һәм скверлар дирекциясен җитәкләгән Марат Закиров Вахитов һәм Идел буе районнары администрациясе башлыгы итеп билгеләнде. «13 ел эчендә Марат Фәрхәт улы күпсанлы халыкара чаралар үткәрде, барлык бу вакыйгалар тарихта иң яхшысы дип танылды. Тәҗрибә зур, әмма яңа вазыйфада күп нәрсәгә өйрәнергә кирәк булачак. Яшь актив җитәкче өчен бу авыр булмаячак, бигрәк тә районнар командасының көчле ярдәме белән», – диде Илсур Метшин.

Шәһәр башлыгы 10 елдан артык Вахитов һәм Идел буе районнары администрациясен җитәкләгән Андрей Лобовның Шәһәр төзелеше һәм архитектурасы идарәсе башлыгы булып билгеләнүен искә төшереп үтте. «Идарә алдында зур бурычлар тора, бу тәҗрибәле җитәкче җитәкчелегендә генә гамәлгә ашырыла ала», – дип ассызыклады шәһәр башлыгы һәм барлык яңа җитәкчеләргә эшләрендә уңышлар теләде.

Белешмә

Гарипов Роберт Зөфәр улы 1984 елның 23-нче апрелендә Түбән Камада туган.

2006 елда Россия Федерациясе Эчке эшләр министрлыгының Казан юридик институтын тәмамлаган, юрист.

2012 елда Казан (Идел буе) федераль университетын тәмамлаган, менеджер.

2014 елда РФ Президенты каршындагы Россия халык хуҗалыгы һәм дәүләт хезмәте академиясен тәмамлаган, дәүләт һәм муниципаль идарә буенча белгеч

2019 елда «Сколково» Мәскәү идарә мәктәбен тәмамлаган, эшлекле идарә итү остасы.

2001 елның сентябреннән 2006 елның сентябренә кадәр – Эчке эшләр бүлекчәсендә хезмәт иткән.

2007 елның маеннан ноябрь аена кадәр – уку-спорт бүлегендә, Казан шәһәре Башкарма комитетының Физик культура һәм  спорт чараларын уздыру бүлегендә әйдәп баручы белгеч.

2007 елның ноябреннән 2010 елның октябренә кадәр – оештыру идарәсенең беркетмә бүлеге баш белгече, Казан Башкарма комитеты Аппаратының инвестиция сәясәте һәм икътисадый үсеш комитетының инновацион эшчәнлек бүлеге башлыгы.

2010 елның октябреннән 2018 елның сентябренә кадәр – Татарстан Республикасы Түбән Кама муниципаль районы Советы Аппараты җитәкчесе.

2018 елның сентябреннән 2019 елның ноябренә кадәр – Казан Башкарма комитетының Авиатөзелеш һәм Яңа Савин районнары администрациясе башлыгының беренче урынбасары.

2019 елның ноябреннән 2021 елның февраленә кадәр – «Иске шәһәр» префектурасы территориясенең префекты.

2021 елның 1-нче мартыннан – «Казан шәһәре парклары һәм скверлары дирекциясе» муниципаль бюджет учреждениесе директоры.

«Беренче класслы хакыйкый муниципаль киңәшче» дигән класс чинына ия.

Өйләнгән, өч бала тәрбияли.

Казан шәһәре Башкарма комитетының Мактау грамотасы (2009), «Бөтенроссия халык санын алуны уздырудагы казанышлары өчен» медале (2012), Түбән Кама районы башлыгының Рәхмәт хаты (2012), «Казанда 2013 елгы XXVII Бөтендөнья җәйге универсиада» медале (2014), Татарстан Республикасы Министрлар Кабинеты Рәхмәте (2014), «Бөтенроссия авыл хуҗалыгы исәбен алуны уздырудагы хезмәтләре өчен» медале (2016), Татарстан Республикасы Президенты Рәхмәте (2016), «Татарстан Республикасында җирле үзидарәне үстерүдәге казанышлары өчен» медале (2018) белән бүләкләнгән.