Казан Мэры Илсур Метшин Nega кәгазь фабрикасында булды

(Казан шәһәре KZN.RU, 19-нчы февраль, Алинә Бережная). Татарстан башкаласы Мэры Илсур Метшин эре җитештерү мәйданчыгы – Nega фабрикасында булды. Предприятиедә аена салфеткалар, бәдрәф кәгазе һәм кәгазь сөлге әзерләү өчен 500 тоннага кадәр кәгазь нигез җитештерәләр.

15 ел эшләү дәверендә фабрика санитария-гигиена продукциясе чыгаручы предприятиеләр арасында ныклы урын алды. Товарның экологик үзенчәлеге тиешле документлар белән расланган, продукция ГОСТның барлык таләпләренә туры китереп беренчел целлюлозаның 100%-ыннан җитештерелә. Кәгазь җитештерү өчен чимал Архангельск һәм Иркутск өлкәләреннән килә.

Фабрикада өч цех эшли: кәгазь эшләнмәләр өчен нигез, рольле кәгазь – кәгазь сөлгеләр һәм бәдрәф кәгазе чыгару, шулай ук салфеткалар җитештерү. Предприятиенең җитештерү куәтләре – аена 500 тонна кәгазь нигез. Аннан 4 млн пачка кәгазь сөлге, бәдрәф кәгазе һәм салфетка ясыйлар. Әзер продукция Татарстанның супермаркет киштәләренә, шулай ук Россиянең күпчелек төбәкләренә җибәрелә һәм хәтта якын чит илләргә дә чыгарыла.

Предприятиедә 214 хезмәткәр эшли, күпчелек процесслар, аерым алганда, әзер продукцияне төрү, автоматлаштырылган. Мәсәлән, минутына 3 мең салфетка төрелә.

Илсур Метшин фабрика җитәкчесе Александр Лутовиновтан предприятиенең ничек пандемияне кичерүе белән кызыксынды.

«Фабрика система барлыкка китерүче предприятиеләр реестрына кертелгән иде, пандемия чорында без бер генә көн дә туктап тормадык, җитештерү өзлексез барды. Вәзгыять хезмәткәрләр санының кимүенә тәэсир итмәде. Әмма җәмәгать туклануы биналарын ябу аркасында бездә кулланучылар саны , һәм, нәтиҗәдә, керем 20%-ка кимеде», – дип сөйләде А.Лутовинов.

«Без, һичшиксез, кече һәм урта бизнеска ярдәм кысаларында, безгә бәйле булган бөтен нәрсәне эшләячәкбез. Бүген моның өчен махсус программалар бар. Җитмәсә, сезнең җитештерү халыкның мәнфәгатьләренә кагыла», – диде Илсур Метшин.

Предприятиедә шулай ук Башкарма комитет җитәкчесе урынбасары Илдар Шакиров, Киров һәм Мәскәү районнары администрациясе башлыгы Сергей Миронов та булды.