ТР Дәүләт Советы депутатлары Казанга «Хезмәт батырлыгы шәһәре» дигән мактаулы исем бирү турындагы тәкъдимне хуплады

(Казан шәһәре KZN.RU, 20-нче февраль). Бүген ТР Дәүләт Советы депутатлары Казанга «Хезмәт батырлыгы шәһәре» дигән мактаулы исем бирү турындагы инициативаны хуплады. 

Казан Мэры Илсур Метшин бүген ТР Дәүләт Советының VII утырышында шундый тәкъдим кертте. Тиешле үтенечнамә Россия Президенты Владимир Путинга җибәреләчәк. И.Метшин үз адресына, шулай ук Казан шәһәре Думасына һәм ТР Президентына Татарстан башкаласына «Хезмәт батырлыгы шәһәре» исемен бирү турында халыктан, иҗтимагый оешмалардан, предприятиеләр коллективларыннан килгән мөрәҗәгатьләр турында сөйләде. «Казанлыларның яшь буыны да битараф калмады: «Бердәм Россия»нең «Яшь гвардиясе»ннән һәм «Җиңү волонтерлары» иҗтимагый берләшмәсеннән, Казан федераль университеты студентларыннан һәм галимнәреннән мөрәҗәгатьләр бар, – диде Мэр. - Бу зур ватанпәрвәрлек һәм шәһәргә, аның тарихына карата мәхәббәт турында сөйли һәм казанлыларның хезмәт батырлыгына лаеклы дәрәҗә һәм исем бирү теләге барлыгын күрсәтә». 

Шәһәр башлыгы Бөек Ватан сугышы елларында Казан предприятиеләрендә 600-дән артык төр корал, сугыш кирәк-яраклары җитештерелүен, аларны әзерләү һәм фронтка җибәрү буенча өзлексез эш башкарылганлыгын искә төшерде. Бу чорда шәһәрнең 139 предприятиесе хәрби җайга күчерелгән. 70-тән артык предприятие Казанга илнең үзәк һәм көнбатыш төбәкләреннән эвакуацияләнгән. Бөек Ватан сугышы елларында оборона өлкәсендә генә түгел, гражданлык производстволарында да фидакарьләрчә хезмәт куйдылар. Шулай итеп, сугыш дәвамында шәһәрнең җиңел сәнәгать предприятиеләре Кызыл Армия сугышчылары өчен 200-гә якын төрдәге әйбер кирәк-яраклары һәм кием-салым җитештергәннәр. 

Дәүләт Советы депутатлары Татарстан башкаласы башлыгының тәкъдимен хуплады. Якын арада тиешле үтенечнамә Россия Президенты Владимир Путинга җибәреләчәк. 

«Шәһәрнең битараф булмаган кешеләреннән килеп ирешкән тәкъдим каралыр, һәм Казан бу лаеклы исемгә ия булыр, дип ышанабыз», – дип нәтиҗә ясады ТР Дәүләт Советы Рәисе урынбасары Юрий Камалтынов. 

Исегезгә төшерәбез, «Хезмәт батырлыгы шәһәре» мактаулы исеме турындагы закон проекты Россия Президенты Владимир Путин тарафыннан 2019 елның декабрендә РФ Дәүләт Думасына кертелде. Бүген документны өченче укылышта карау планлаштырыла.

Сессия эшендә Татарстан Республикасы Президенты Рөстәм Миңнеханов, Татарстан Республикасы Дәүләт Киңәшчесе Минтимер Шәймиев, Татарстан Республикасы Премьер-министры Алексей Песошин, Татарстан Республикасы Президенты Аппараты Җитәкчесе Әсгать Сәфәров, республика министрлыклары җитәкчеләре һәм башкалар катнашты.