Мәскәүдә "Бердәм Россия" Бөтенроссия сәяси партиясенең XVIII съездының пленар утырышы узды

(Казан шәһәре KZN.RU, 8-нче декабрь). Мәскәүдә "Крокус Экспо" Халыкара күргәзмә үзәгендә "Бердәм Россия" Бөтенроссия сәяси партиясенең XVIII съезды узды. Съезд кысаларында партиянең Югары һәм Генераль Советларының уртак утырышы узды. Россия Президенты Владимир Путин XVIII съездның пленар утырышында катнашты, анда доклад белән чыгыш ясады. Делегатлар, аерым алганда, киләсе елга партиянең бурычларын һәм актуаль эш юнәлешләрен билгеләделәр.

Съездда Татарстанны ТР Президенты Рөстәм Миңнеханов, ТР Дәүләт Советы Рәисе Фәрит Мөхәммәтшин, Казан Мэры Илсур Метшин һәм башкалар тәкъдим итте.

Съездда бөтен Россиядән 3,5 меңгә якын кеше катнашты, алар арасында партиянең төбәк бүлекләреннән делегатлар, министрлыклар һәм ведомстволар җитәкчеләре, Дәүләт Думасы депутатлары, төбәкләрнең башкарма һәм закон чыгару хакимияте органнары вәкилләре, партиянең төбәк сәяси советлары секретарьлары, экспертлар һәм башкалар бар иде.

Пленар утырыш барышында Владимир Путин билгеләп үткәнчә, "Бердәм Россия" өчен төп бурыч булып партия абруен яклау тора. Президент шулай ук билгеләп үткәнчә, кандидатларга илнең төгәл үсеш программасыннан башка теләсә кайсы дәрәҗәдәге хакимияткә килү хакы юк.

Шулай ук Владимир Путин "Бердәм Россия" партиясе әгъзаларын бер урында таптанмаска, нәтиҗә ясарга чакырды. "Сезнең вәкилләрегез бөтен җирдә, хакимиятнең барлык органнарында һәм эшчәнлек өлкәләрендә бар. Һәм, әлбәттә, күпчелек очракта, бу - тәртипле, профессиональ кешеләр, Россия патриотлары. Әмма бу хакта да әйтергә кирәк (һәрвакыт һәм бөтен җирдә дә шулай бара) конъюнктура белән файдаланучылар да бар, хакимияткә, бигрәк тә сәяси көчкә бик теләп ябышкан кешеләр дә бар", - дип билгеләп үтте Владимир Путин.

"Бердәм Россиянең" XVIII съезды 2018 елның 7-8 декабрендә уза. Съездның беренче көнендә өч дискуссия мәйданчыгы эшләде – "Яңару", "Ачыклык" һәм "Лидерлык", анда катнашучылар һәм делегатлар "Яңару-2018" төбәк съезд алды дискуссияләренә йомгак ясадылар, Партия Уставына идеологик преамбуланы расларга, "Бердәм Россия" әгъзалары өчен этик нормалар расларга, этика буенча комиссия төзергә, партия "беренчел" иҗтимагый әһәмиятле проектларына грант ярдәмен кертергә һәм башка тәкъдимнәр керттеләр.

Бүген, съездның икенче көнендә, анда Россия Президенты Владимир Путин һәм "Бердәм Россия" партиясе рәисе, Россия Премьер-министры Дмитрий Медведев катнаша. Съезд эше кысаларында 2018 елда партия программасын гамәлгә ашыруга багышланган дискуссия мәйданчыклары форматында программа форумы уза: "Үсеш икътисады", "Тормыш сыйфаты", "Шәһәр тирәлеге һәм чиста ил", "Авыл территорияләрен үстерү".