Рөстәм Миңнеханов прокуратура хезмәткәрләрен һөнәри бәйрәмнәре белән котлады

Тантаналы чарада Казан Мэры Илсур Метшин да катнашты.

(Казан шәһәре KZN.RU, 13-нче гыйнвар). Бүген Казанда Россия Федерациясе прокуратурасы көне уңаеннан бәйрәм чарасы уздырылды. Прокурорларны һөнәри бәйрәмнәре белән Татарстан Республикасы Президенты Рөстәм Миңнеханов котлады. Тантанада шулай ук Татарстан Республикасы Дәүләт Советы Рәисе Фәрит Мөхәммәтшин, Казан Мэры Илсур Метшин, Татарстан Республикасы буенча эчке эшләр министры Артем Хохорин, ведомстволар җитәкчеләре, республика прокуратурасы органнары хезмәткәрләре катнашты.

Бәйрәм чарасы Россия Генераль прокуроры Юрий Чайканың видеокотлавын трансляцияләүдән башланды. Шуннан соң Татарстан Республикасы Президенты Рөстәм Миңнеханов җыелганнарны бәйрәм белән котлады.

«Хөрмәтле прокуратура ветераннары һәм хезмәткәрләре, сезне чын күңелдән һөнәри бәйрәмегез – Прокуратура көне белән котлыйм.

Күп еллар дәвамында прокуратура дәүләтнең ышанычлы таянычы булды, республиканың социаль-икътисадый үсешенә зур өлеш кертә һәм бизнес алып бару өчен уңай шартлар тудыра. Җинаятьчелеккә һәм коррупциягә каршы аямас көрәш, гражданнарның хокукларын яклау, икътисадый киңлекләрнең бердәмлеген тәэмин итү – бу сезнең көндәлек эшегезнең бер өлеше генә. Сезнең эшегез нәтиҗәләре буенча кешеләр дәүләтнең тәртип урнаштыру һәм законлылыкны тәэмин итү сәләте турында фикер йөртә.

Прокуратура – кеше кыен хәлдә калгач мөрәҗәгать итә торган орган. Гражданнар монда ярдәм таба алачагына, аларның законлы хокукларын тиешенчә яклаячакларына бик нык ышанырга тиеш.

Прокуратураның мөһим бурычы – хокук саклау органнарының җинаятьчелеккә каршы көрәш буенча эшчәнлеген җайга салу. Җәмгыять иминлеге һәм дәүләт тотрыклылыгы асылда сезнең нәтиҗәле эшчәнлегегезгә бәйле.

Республикада милләтара һәм конфессиональара татулыкны саклап калу өлкәсендә дә җитди эш алып барыла.

Алда мөһим вакыйгалар тора – Татарстан Республикасы Президентын һәм җирле үзидарә органнарын сайлаулар, су спорт төрләре буенча бөтендөнья чемпионаты, 2017 елда футбол буенча конфедерация кубогы һәм 2018 елда дөнья чемпионаты. Куелган бурычларны җиренә җиткереп үтәрбез, дип ышанам.

Сезне һөнәри бәйрәмегез белән котлыйм, сезгә һәм гаиләләрегезгә исәнлек-саулык, иркен тормыш һәм бәхет-шатлык телим».

Шуннан соң Рөстәм Миңнеханов дәүләт бүләкләре тапшырды. «Фидакарь хезмәт өчен» медале Чаллы прокуроры урынбасары Антонида Марковага, прокуратура бүлегенең өлкән прокуроры Васыйл Хисамовка, Татарстанның Биектау районы прокуроры Минәкъдәс Шәрәповка бирелде.

Хезмәттәшләрен һөнәри бәйрәмнәре белән Татарстан Республикасы прокуроры Илдус Нәфыйков та котлады. Ул шулай ук ведомство бүләкләрен тапшырды. Прокуратура хезмәткәрләре адресына котлау сүзләре белән Татарстан Республикасы буенча Баш федераль инспектор Ренат Тимерҗанов та мөрәҗәгать итте, дип хәбәр итә ТР Президентының матбугат хезмәте.

Фоторепортаж

Видеорепортаж