Илсур Метшин Гуанчжоу Мэры белән очрашты

Казан шәһәре KZN.RU, 15 нче сентябрь). Казан мэры Илсур Метшин һәм Гуанчжоу Мэры Го Юнхан ике шәһәрнең хезмәттәшлеге турында фикер алыштылар. Очрашу Кытайның Гуандун провинциясе башкаласында узды, анда Татарстан башкаласы башлыгы рәсми визит белән. Яклар тәҗрибә өйрәнергә һәм шәһәр хуҗалыгы өлкәсендә иң яхшы практикалар белән уртаклашырга, спорт, туризм, төзекләндерү, икътисад һәм эшкуарлык кебек өлкәләрдә уртак проектларны үстерергә планлаштыралар.

Визит барышында Илсур Метшин Гуанчжоу шәһәр планлаштыру күргәзмә үзәгендә һәм дәүләт һәм муниципаль хезмәтләр күрсәтү үзәгендә булды. Татарстан башкаласы башлыгына Гуанчжоуның төзелеш өлкәсендәге казанышлары, шәһәрне үстерү буенча планнары турында сөйләделәр, шулай ук Кытай мәктәпләрендә укытуның ничек оештырылганын күрсәттеләр. 

Кантон манарасында Казан Мэры Гуанчжоу Мэры белән очрашты. Илсур Метшин белән әңгәмәдә Го Юнхан билгеләп үткәнчә, шәһәрләр арасында туганлык мөнәсәбәтләре турында килешү имзаланганнан бирле якын һәм дуслык бәйләнешләре барлыкка килде, хезмәттәшлек нәтиҗәле бара, киләчәк хезмәттәшлек өчен ныклы нигез салынды. Гуанчжоу Мэры ассызыклаганча, дәүләт башлыклары җитәкчелегендә Россия һәм Кытай арасында сәүдә-икътисади мөнәсәбәтләр үсеш ала, илләр туризм, спорт һәм мәдәният өлкәсендә тәҗрибә белән алмаша. Бүгенге көндә төп бурычлар – үзара файдалы хезмәттәшлекнең югары дәрәҗәсенә чыгу, дип саный Го Юнхан. 

Үз чиратында Илсур Метшин Гуанчжоуның Казанның социаль-икътисади үсеше өлкәсендәге тугандаш мөнәсәбәтләр урнаштырылганнан бирле күрсәткән ярдәме өчен рәхмәт белдерде. ТР башкаласы Мэры билгеләп үткәнчә, Казан спорт, фән һәм технологияләр, мәгариф, яшьләр алмашу өлкәсендә хезмәттәшлекне ныгытуга ярдәм итәчәк, хезмәттәшлекнең үрнәк моделен булдырырга омтылачак. 

Очрашу ахырында Илсур Метшин Гуанчжоу Мэрын 2024 елның февралендә Казанда узачак «Киләчәк уеннары»н карарга чакырды. Го Юнхан, Кытайның киберспорт үзәкләренең берсе булган шәһәр башлыгы буларак, Татарстанга килергә әзерлеген белдерде. 

Исегезгә төшерәбез, Гуанчжоу шәһәре Гуандун провинциясенең башкаласы булып тора – бу бөтен көньяк Кытайның сәяси, икътисади, фәнни-техник, мәгариф, мәдәни һәм транспорт үзәге. 14 миллионнан артык халкы булган Гуанчжоу Кытайның зурлыгы буенча дүртенче шәһәре булып санала. 

Казан һәм Гуанчжоу 2012 елдан бирле тугандаш шәһәрләр булып торалар һәм төрле юнәлешләр буенча актив хезмәттәшлек итәләр. Мәсәлән, Гуанчжоу делегацияләре Казанга халыкара дәрәҗәдәге спорт чараларын үткәрү тәҗрибәсен өйрәнергә килделәр. Туризм өлкәсендә Кытайдан туристлар визитын оештыру белән хезмәттәшлек урнаштырылган – Татарстан башкаласы алар өчен кызыклы, чөнки безнең шәһәр аша «Кызыл маршрут» үтә. 2020 елда, COVID-19 белән көрәш вакытында, Кытай шәһәре Казан мәктәпләре һәм балалар бакчалары өчен 50 мең медицина битлеге һәм 100 термометр тапшырган – бу Кытай шәһәрләренең үз тугандаш шәһәрләренә җибәргән иң зур партия. Узган ел Кытай ягы Казан федераль университетына «Кантон музыка сәнгате энциклопедиясе яки Гуанчжоу энциклопедиясе» дигән уникаль китаплар коллекциясен бүләк итте. Кырык өч томда Гуанчжоуның күренекле шәхесләренең хезмәтләре, тарих һәм мәдәният буенча әдәбиятның күренекле үрнәкләре, шулай ук сирәк китап битләренең күчермәләре тупланган. Гуанчжоу энциклопедиясе – Кытай сәнгатенең борынгыдан бүгенге көнгә кадәр иң яхшы үрнәкләре комплексы. 

Хәзерге вакытта яклар уртак чараларда катнашырга планлаштыралар:Kazan Digital Week форумында Мэрларның түгәрәк өстәлендә һәм Гуанчжоуда Кантон күргәзмәсендә. Элегрәк Гуанчжоу вәкилләре Казанда «РОСТКИ» Россия-Кытай форумында булдылар. 

Гуанчжоу һәм Казан Бөтендөнья эре шәһәрләр ассоциациясе («Метрополис» оешмасы) һәм Бөтендөнья «Берләшкән шәһәрләр һәм җирле хакимиятләр» оешмасы әгъзалары булып торалар. 2023 елның июнендә Брюссельдә узган 14 нче Бөтендөнья «Метрополис» конгрессы кысаларында Казан Мэры оешманың төбәк вице-президенты итеп сайланды һәм «Евразия һәм Якын көнчыгыш» бүлекчәсен җитәкли. Гуанчжоу Мэры Го Юнхан «Метрополис»ның со-президенты булып тора. 

Делегация составына шулай ук Казан шәһәре муниципаль берәмлеге башлыгы урынбасары Евгения Лодвигова, халыкара һәм муниципальара элемтәләр идарәсе башлыгы Руслан Галиәхмәтов һ.б. керде.