Рөстәм Миңнеханов һәм Илсур Метшин «Украина. На переломах эпох» мультимедиа күргәзмәсендә булдылар

(Казан шәһәре KZN.RU, 26 нчы гыйнвар). ТР Президенты Рөстәм Миңнеханов һәм Казан Мэры Илсур Метшин «Украина. На переломах эпох» мультимедиа күргәзмәсендә булдылар. Күргәзмә «Россия – минем тарихым» тарихи паркында оештырылган.

10 тематик экспозиция залы борынгы Россия дәүләте оешканнан алып бүгенге вакыйгаларга кадәр зур тарихи чорны үз эченә ала. Экспозициядә Русьне кенәз Владимир чукындыруы, Малороссиянең Рус патшалыгына керүе, Кырымның кушылуы, Екатерина II идарәсендә Новороссия булдыру, Украина УССР төзелүе, 1941-1945 еллардагы Бөек Ватан сугышы, СССР таркалуы, Украинаның иң яңа тарихы башлануы, Донбасс фаҗигасе, Кырымның һәм көньяк-көнчыгыш төбәкләрнең Россиягә кайтуы кебек вакыйгалар чагылдырыла.

Килүчеләр өчен уникаль фото- һәм видеоматериаллар, кинохроника, карталар, плакатлар һәм күп санлы архив документлары әзерләнгән. Күргәзмәне төзегәндә заманча мультимедиа технологияләре кулланылган: проекцияләр, кинектлар, интерактив панельләр.

Рөстәм Миңнеханов күргәзмәнең форматын һәм эчтәлеген югары бәяләде. «Бу – яңа, бик актуаль формат. Безнең дәүләтебез тарихы, аның формалашуы, Украинада барган вакыйгалар – барысы да бик кызыклы һәм аңлаешлы телдә тәкъдим ителә. Әлбәттә, без проектны эшләүчеләргә рәхмәт әйтәбез. Безнең һәрберебез үз тарихын белергә тиеш, бу аеруча балаларга кагыла. Монда бу бик профессиональ һәм яхшы оештырылган», - диде ТР Президенты.

«Украина. На переломах эпох» беренче мультимедиа күргәзмәсе Мәскәүнең «Манеж» үзәк күргәзмә залында үтте. Өч атна эчендә экспозициядә 55 меңнән артык кеше булды, шул исәптән Италия, Япония, Арммәнстан, Германия, Белоруссия, Кытай, Казахстан, Луганск Халык Республикасы һәм Донецк Халык Республикасы кунаклары. Казанда күргәзмә 24 нче гыйнвардан 24 нче февралгә кадәр дәвам итәчәк, дип хәбәр итә ТР Президенты матбугат хезмәте.