Татарстан Республикасында тарихи җирлекләрдә шәһәр төзелеше эшчәнлеге мәсьәләләре буенча комиссия утырышында 20 проект хупланды

(Казан шәһәре KZN.RU, 23-нче декабрь). Тарихи җирлекләрдә шәһәр төзелеше эшчәнлеге мәсьәләләре буенча ведомствоара комиссия утырышында 20 проект хупланды. Татарстан Республикасы Президенты Рөстәм Миңнеханов уздырган киңәшмәдә Казан, Зөя һәм Чистай тарихи җирлекләрендә төзелеш проектлары каралды. Утырышта ТР Президенты Аппараты җитәкчесе Әсгать Сәфәров, Казан Мэры Илсур Метшин, ТР Президенты ярдәмчесе Олеся Балтусова, республика министрлыклары һәм ведомстволары җитәкчеләре катнашты. Татарстан башкаласындагы проектларны шәһәрнең баш архитекторы Илсөяр Төхвәтуллина тәкъдим итте.

Тарихи җирлекләрдә төзелеш проектларын карау комиссиясе быел икенче тапкыр җыелды. Рөстәм Миңнеханов билгеләп үткәнчә, раслана торган проектларның мәдәни мирас объектларының һәм кыйммәтле тирәлек объектларының сакланышын тәэмин итүе, территорияләрнең тышкы күренешен бозмавы мөһим.

Мәсәлән, «Кольцо» сәүдә үзәген реконструкцияләү, Гаяз Исхакый урамында күпфатирлы торак йорт төзү, Подлужная урамында (барлык таләпләргә туры килә) ирекле билгеләнештәге бина төзү, Клара Цеткин, Урицкий һәм Милиция урамнары чикләрендә берничә участок төзү (офис һәм сәүдә объектлары), Гладилов урамы, 31 адресы буенча ике катлы офис бинасы төзү кебек төзелеш проектлары хупланды.

Шулай ук Гладилов ур., 53 (ике тәкъдим ителгән вариантның беренчесе хупланды) адресы буенча объектлар төркемен төзү концепциясе, 1 Май урамындагы автомойка проекты (якын территорияне төзекләндерергә тәкъдим ителде) хупланды. Моннан тыш, Аркылы Базар урамында офис бинасы, 1 Май урамында техник хезмәт күрсәтү һәм авто ремонтлау, Брюсов ур., 43, Карельская ур., 51 һәм Кызыл Армия ур.,37 адреслары буенча шәхси торак йортлар төзү, Пролетарская урамында АЗС реконструкцияләү проектлары комиссиянең хуплавын алды.

Нур Баян урамында төзелергә планлаштырылган торак комплексы шик тудырды. Рөстәм Миңнеханов проектны, элек әйтелгән таләпләрне исәпкә алып, яңадан эшләргә тәкъдим итте. Островский урамындагы төзелеш концепциясе турында сөйләгәндә, Рөстәм Миңнеханов территорияне урында караганнан соң проектка кире кайтырга тәкъдим итте, дип хәбәр итә ТР Президенты матбугат хезмәте.

Исегезгә төшерәбез, элегрәк И.Метшин девелоперлар өчен эстетикага һәм проектлау сыйфатына таләпләр планын арттырырга чакырды.